Hewlêr (Rûdaw) - Serok Mesûd Barzanî ji Newroza Amedê re peyam şand û got, ”Hêvî dikim Abdullah Ocalan di demeke nêzîk de azad bibe,”
Newroza Mezin îro li Ameda Bakurê Kurdistanê tê pîrozkirin û gel diherike qada Newrozê.
Agirê yekem ê Newroza îsal 12ê Adarê li navçeya Licê ya Amedê hat pêxistin û pîrozbahiyan heta îro dewam kir.
Îro jî dora Newroza Mezin a Amedê ye, şahî li Parka Newrozê tê lidarxistin.
Endamê Polîtburoya Partiya Demokrat a Kurdistanê (PDK) Serbest Lezgîn û Berdevkê Serokatiya Herêma Kurdistanê Dilşad Şehab jî tevlî Newroza Amedê bûn.
Serbest Lezgîn peyama Serok Barzanî xwend.
Serok Mesûd Barzanî di peyama xwe de got:
“Ez hêvî dikim Abdullah Ocalan di demeke nêzîk de azad bibe
Newroza her çar parçeyên Kurdistanê pîroz dikim.
Em piştgiriyê didin pêvajoya çarserî û aştiyê
Aştî yekane rêya rast a derbaskirina pirsgirêkan e
Em hêvî dikin li Sûriyeyê dawî li êş û azarên Kurdan were"
"Ez hêvî dikim Birêz Ocalan di demeke nêzîk de azad bibe"
Peyama Serok Mesûd Barzanî ya ji bo Newroza Amedê wisa ye:
“Newroz bo gelê Kurdistanê, bihar, nûbûn û azadî ye
Newroz wateya jiyaneke nû û mizgîniya serkeftina ronahiyê li hemberî tarîtî û zilmê dide. Bi merasîma hatina cejna neteweyî ya Newrozê, ez pîrozbahiyê li malbatên serbilind ên şehîdan, Pêşmergeyên qehreman û hemû çîn û tebeqeyên Kurdistanê dikim.
Ez pîrozbahiya Newrozê li hemû zarokên gelê Kurd li her çar perçeyên Kurdistanê dikim. Ez pîrozbahiyê li hemû wan gelan dikim ku Newroz bûye beşek ji çand û kevneşopiya wan.
Li vir dixwazim bi germî pîrozbahiya Newrozê li koçberên Kurd û wan milyonan Kurdan bikim ku bi hesteke bilind û dûr ji axa niştiman Cejna Newrozê bilind digirin û bihayên Newrozê li hemû cîhanê belav dikin.
Ez ji wan re dibêjim ku hûn her dem di hizr û wijdana me de ne.
Şahî û cejnên we dirêjahiya şahî û cejnên me ne. Cihê şanaziyê ye ku em dibînin hûn di Newrozê de alaya azadiyê û rûmetê bilind dikin.
Ez gelekî kêfxweş im ku li bajarê Kolnê yê welatê Almanyayê ahengên Newrozê tên lidarxistin û hûn hestên xwe ji bo welatê xwe dubare dikin. Hûn deng û rengê gelê xwe ne û ez destxweşiyê li we dikim.
Di roja cejna neteweyî ya Newrozê de bi şanazî em tekeziyê li ser çanda pêkvejiyanê û peyama aştîxwaziyê ya gelê Kurdistanê dikin. Her ji vê nerînê ve em piştgirê pêvajoya çareseriyê û aştiyê ne li Tirkiyeyê.
Em hêvîdar in ku di demeke nêzîk de Birêz Abdullah Ocalan were azadkirin û em aştiyê wek rêya tenê ya rast û dirust ji bo çareserkirina pirsgirêkan dibînin.
Her di vê boneyê de em bi wê hêviyê ne ku dawî li êş û azarên Kurdan li Sûriyeyê were.
Kurd bi helwesteke hevpar û rêbazeke aştiyane li gel aliyên din ên Sûriyeyê bigihêjin encamekê ku di xizmeta hemû aliyan de be.
Ez hêvîdar im ku Newroza îsal bibe destpêkek ji bo aramî û xweşiyê ji bo hemû xelkê Kurdistanê û herêmê bi giştî.
Ew Newroz û hemû cejnên we di bextewerî û aştiyê de derbas bibin.
Ez hêvî dikim ku gelên herêmê bikaribin di bin siya aramî û îstîqrarê de, di atmosfereke aştiyane û birayane de bijîn.
Newroza we pîroz be, bijîn bi xêr û xweşî.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse