رووداو دیجیتاڵ
حکومەتی تورکیا لە پێدانی گازی سرووشتیدا هاوکاریی زیاتری ئەو پارێزگایانە دەکات کە کەشوهەوا تێیاندا زۆر ساردە. ساردترینیان جۆلەمێرگی باکووری کوردستانە.
بەگوێرەی بڕیارێکی حکومەتی تورکیا، لەمەودوا نرخی پسووڵەی گاز بەگوێرەی پارێزگاکان دەگۆڕدرێت و هەر پارێزگایەکیش بڕێک گازی سرووشتی پێدەدرێت.
عەلی رەزا ئۆنەر، سەرۆکی کۆمەڵەی وزە و بەرهەمهێنانی وزە رایگەیاند، سەرەتا وەزارەتی وزە و سامانە سرووشتییەکانی تورکیا لە ژمارەیەک پارێزگا، ئەو رێگەیەی لە پێدانی کارەبا پەیڕەوکرد و ئەنجامی باشی هەبوو.
لە هەر 100 ماڵێکی تورکیا و باکووری کوردستاندا، 59ـیان بۆ گەرمبوونەوە، ئاوی گەرم و ئامادەکردنی خواردن، گازی سرووشتی بەکاردێنن.
بە گوتەی عەلی رەزا ئۆندەر، بۆ ئەوەی بە یەک چاو سەیری شوێنە گەرم و شارە ساردەکان نەکرێت، حکومەت ئەو هەنگاوەی ناوە و پاکێجی گازی سرووشتیی ئەو پارێزگایانەی جیاکردووەتەوە.
بەگوێرەی دوایین ئاماری حکومەت، ساڵی 2023 زۆرترین بڕی گازی سرووشتی لەلایەن خەڵکی پارێزگای جۆلەمێرگەوە بەکارهێندراوە، کە بۆ هەر ماڵێک تێكڕا هەزار و 401 مەتر سێجا بووە.
دوای ئەو، ئەرزەڕۆمی باکووری کوردستان بووە کە هەزار و 348 مەتر سێجا بووە؛ ئەردەخانی باکووری کوردستان بە هەزار و 317 مەتر سێجا و مووش بە هەزار و 311 مەتر سێجا لە پلەکانی سێیەم و چوارەم هاتوون؛ پلەی پێنجەمیش هەر لە باکووری کوردستانە کە پارێزگای ئاگرییە و بە تێکرا هەر ماڵێک هەزار و 224 مەتر سێجا گازی سرووشتی بەکارهێناوە.
لە ئەنقەرە بە شێوەی تێکڕا هەر ماڵێک هەزار و 67 مەتر سێجا گازی سرووشتی بەکارهێناوە. ئەو ژمارەیە لە ئیستەنبووڵ 869 مەتر سێجا و لە ئیزمیریش 736 مەتر سێجا بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ