وەزارەتی پەروەردە داوا دەکات لە سیستەمی یەکپۆشیدا گوشار نەخرێتە سەر قوتابییان

 

بەپێی نووسراوی ژمارە 19738ـی وەزارەتی پەروەردەی هەرێمی کوردستان کە لە رۆژی چوارشەممە، 6-9-2023 دەرچووە و واژی رەگەز رەشید، بەڕێوەبەری گشتیی دیوانی وەزارەتەکەی لەسەرە و ئاڕاستەی بەڕێوەبەرایەتییە گشتییەکانی پەروەردە لە هەولێر، سلێمانی، دهۆک، گەرمیان، هەڵەبجە، سۆران، زاخۆ و راپەڕین. کراوە، داوا کراوە "بە لەبەرچاوگرتنی باری گوزەرانی هاووڵاتییان، پێویستە لەسەر کارگێڕی سەرجەم ناوەندەکانی خوێندنی حکومی گوشار نەخەنە سەر قوتابییان و خوێندکاران لەکاتی پابەندبوونی تەواویان بە یەکپۆشی و ئاسانکارییان لە سیستەمی یەکپۆشی بۆ بکرێت تاوەکو بەنووسراوی فەرمی ئاگادارتان دەکەینەوە."

 

لە نووسراوەکەدا هەروەها هاتووە "هیچ ناوەندێکی خوێندنی حکومی، نابێت لێکدانەوەی شەخسی بۆ ئەم بابەتە بکەن و نابێت رێگە لە ئامادەبوونی قوتابییان و خوێندکاران بگرن لەدەوام کردن، بەهۆی جێبەجێنەکردنی تەواوی سیستەمی یەکپۆشی، لە هەمانکاتیشدا پێویستە قوتابیان و خوێندکاران جلوبەرگیان گونجاو بێت بۆ ناوەندەکانی  خوێندن."

 

رۆژی چوارشەممە 6-9-2023 عومەر محەممەد، جێگری بەڕێوەبەری گشتیی پەروەردەی سلێمانی، بە تۆڕی میدیایی رووداوی راگەیاند: بڕیارەکە بە لەبەرچاوگرتنی دۆخی دارایی خەڵک دراوە.

 

جێگری بەڕێوەبەری گشتی پەروەردەی سلێمانی گوتیشی "چەند ساڵێک بوو بەشێک لە ناوەندەکانی خوێندنی حکومی لەگەڵ ژمارەیەک کۆمپانیا رێککەوتبوون و بەشێکشیان بەسەر کەسوکاری قوتابییان سەپاندبوونیان کە دەبێت لەو شوێنە جلوبەرگ بکڕن (کە دیاریانکردووە) و، لە شوێنی دیکە نەیکڕن."