خێوەتگەی دێر بەلح لە غەززە.
رووداو دیجیتاڵ
ئاوارە فەلەستینییەکان لە خێوەتگەی شاری دێر بەلح، لە نێوەڕاستی کەرتی غەززە تووڕەن لە بیرۆکە نوێیەکەی سەرۆکی ئەمریکا بۆ چۆڵکردنی غەززە.
سەمیحە زاهیر، ئاوارەی غەززەیە و دەڵێت: "ترەمپ دەتوانێت خەون بەوە ببینێت لێرە دەرمان بکات، نە ئەو و نە هیچ کەسی دیکە لەسەروو ئەوەوە، ناتوانێت ئەو کارەمان بەسەر بهێنێت."
ئەحمەد عەبدوڵڵا، ئاوارەیەکی دیکەیە و دەڵێت: "بە ترەمپ دەڵێین یەک ئینج غەززە بەجێناهێڵین و خاکەکەمان نافرۆشین، سوورین لەسەر مانەوە لە نیشتمانمان، سەرەڕای هەموو ئەو ئازار و نەهامەتییە."
رۆژی سێشەممە دۆناڵد ترەمپ رایگەیاند بیرۆکەی ئەو بۆ غەززە ئەوەیە، وڵاتانی ناوچەکە غەززەییەکان وەرگرن و ئەمریکا دەست بەسەر ئەو کەرتەدا بگرێت و بیکاتە ناوەندێکی نێودەوڵەتی بازرگانی.
ئەو بیرۆکەیەش شەپۆلی ناڕەزایەتی لە جیهانی عەرەبی و وڵاتانی رۆژئاوای بەدوای خۆیدا هێنا.
هەرچەندە پێشنیازەکەی ترەمپ بەگشتی لە بەرژەوەندیی ئیسرائیلە، بەڵام دانیشتووانی تەلئەڤیڤی ئیسرائیل هێشتا دوودڵن لەو بیرۆکەیە.
نایم واینبێرگ، دانیشتووی شاری تەلئەڤیڤە و دەڵێت: "زۆر خەممە ئەم پێشنیازە حەماس و وڵاتانی عەرەبی زیاتر تووڕە بکات وەکو قەتەر و میسر کە لایەنی دانوستاندنکارن و ئەمەش ببێتە هۆی پاشگەزبوونەوەیان لە گەیشتن بە رێککەوتنی کۆتایی بۆ ئازادکردنی 79 بارمتە لە غەززە."
ئیلیاو لیزۆرکین، دانیشتووی شاری تەلئەڤیڤ دەڵێت: "پلانەکەی بۆ غەززە لە بیرۆکەیەکی شێتانە دەچێت، بەڵام هەموو شتێک کە یەکەمجار ترەمپ دەیڵێت شێتانەیە، کەچی لە کۆتاییدا راست دەردەچێت."
بەهۆی جەنگە 15 مانگییەکەی غەززەوە، زیاتر لە ملیۆنێک و 700 هەزار لە دانیشتووی ئەو کەرتە، کە دەکاتە 83٪ دانیشتووانەکەی، ئاوارەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ