رووداو دیجیتاڵ
فرێنکی دی یۆنگ، ئەستێرەی هێڵی ناوەڕاستی یانەی بارسێلۆنا، بەهۆی ئەو پێکانەوەی دووچاری بووە، داهاتوویەکی نادیاری هەیە و ئەگەری هەیە تاوەکو ساڵی 2025 نەگەڕێتەوە بۆ یارییکردن.
وەرزی رابردوو، فرێنکی دی یۆنگ، وەرزێکی خراپ و پڕ لە پێکانی هەبوو، هەموو پێکانەکانی ئەو یاریزانە لە پاژنەی پێیدا بوون.
لە مانگی نۆی ساڵی رابردوو، دی یۆنگ تووشی سوڕانی پاژنەی پێی بوو و بۆ ماوەی 61 رۆژ لە یاریگەکان دوورکەوتەوە، دوای گەڕانەوەی ئەو یاریزانە و یاریکردنی لە ریزەکانی یانەی بارسێلۆنا، لە مانگی سێی ئەمساڵدا دووبارە تووشی پێکانێکی دیکە بوو لە پاژنەی پێی و بۆ ماوەی مانگێک لە یاریگەکان دوورکەوتەوە.
دوای گەڕانەوەی لەو پێکانە بە دوو هەفتە، تووشی پێکانێکی دیکەی پاژنەی پێ بوو و تا کۆتایی وەرز لە یاریگەکان دوورکەوتەوە، پێشبینی دەکرا لەگەڵ سەرەتای وەرزی نوێ دووبارە بگەڕێتەوە ریزەکانی یانەی بارسێلۆنا، بەڵام یانەکە رایگەیاند کە ئەو یاریزانە هێشتا لە پێکانەکەی چاکنەبووەتەوە و ئامادە نییە بۆ ئەوەی لە راهێنانەکاندا بەشدار بێت.
سەرچاوە ئیسپانییەکان رایانگەیاند، یانەی بارسێلۆنا ئامۆژگاری یاریزانەکەی کردووە بۆ ئەنجامدانی نەشتەرگەری بۆ پاژنەی پێی و یانەکە وای دەبینێت، ئەوە تاکە چارەسەرە بۆ ئەوەی بە زووترین کات بگەڕێتەوە یاریگەکان، بەڵام یاریزانەکە تاوەکو ئێستا رەزامەندی نەداوە و ترسی هەیە لەوەی پاژنەی پێی نەگەڕێتەوە دۆخی پێشووی و هەربەو هۆیەشەوە نایەوێت نەشتەرگەری بکات.
دی یۆنگ لە ساڵی رابردوودا 240 رۆژ بەهۆی پێکانەوە لە یاریگەکان دوورکەوتووەتەوە، ئەمە لە کاتێکدایە یانەی بارسێلۆنا پێویستییەکی زۆری بەو یاریزانە هەیە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ