رووداو دیجیتاڵ
رێبەری باڵای کۆماری ئیسلامیی ئێران وەڵامی هەڕەشەکانی سەرۆکی ئەمریکا دەداتەوە و دەڵێ "بەدڵنیاییەوە لە بەرامبەر گورزەکەی ئەوان، گورزێکی تووندمان دەبێت."
دۆناڵد ترەمپ، سەرۆکی ئەمریکا رایگەیاندبوو، ئەگەر لەبارەی پڕۆگرامە ئەتۆمییەکەی ئێران نەگەنە رێککەوتنێک، ئێران بۆردوومان دەکات.
رۆژی دووشەممە (31ـی ئاداری 2025) عەلی خامنەیی، رێبەری کۆماری ئیسلامیی ئێران لە تاران پێشنوێژی جەژنی رەمەزانی کرد، دواتر گوتارێکی پێشکێش کرد و تێیدا ئاماژە بە دۆخی ناوچەکە، هێرشەکانی ئیسرائیل بۆ سەر غەززە و لوبنان، سیاسەتی ئەمریکا و وڵاتانی رۆژئاوا بەرامبەر کۆماری ئیسلامیی ئێران و هەڕەشەکانی ئەمدواییەی بەرپرسانی ئەمریکا لە دژی ئێران کرد.
عەلی خامنەیی ئاماژەی بە هێرشە بەردەوامەکانی ئیسرائیل لە رۆژهەڵاتی نێوەڕاست کرد و رایگەیاند، "لەم ناوچەیەدا تەنیا یەک هێزی بەوەکالەت هەیە، ئەویش رژێمی گەندەڵ و قۆرخکاری زایۆنییە. رژێمی زایۆنی بە نوێنەرایەتی کۆڵۆنیالیستەکانەوە هێرش دەکاتە سەر وڵاتان."
خامنەیی گوتی، "تیرۆرکردنی کەسایەتییەکان کردەوەیەکی باوی زایۆنییەکانە و لەو رووەوە لەلایەن ئەمریکا و وڵاتانی رۆژئاواوە پشتیوانی دەکرێت". گوتیشی: "دەبێت ئەم تاقمە تاوانکارییە لە فەلەستین بنبڕبکرێت و پشتیوان بە خوا بنبڕیش دەکرێت."
رێبەری باڵای کۆماری ئیسلامیی ئێران ئاماژە بە گرژییەکانی نێوان ئێران و ئەمریکا کردەوە و جەختی کردەوە کە هەڵوێستیان نەگۆڕاوە، ئەگەر هێرش بکرێتە سەر ئێران، وەڵامێکی تووندیان دەبێت.
عەلی خامنەیی گوتی "هەموو لایەک بزانن، هەڵویستمان هەر هەمان هەڵویستی جارانە. دوژمنایەتی ئەمریکا و رژێمی زایۆنیش، هەر هەمان شتە کە جاران هەبوو. هەڕەشە دەکەن کە شەڕانگیزی دەکەن، هەڵبەت ئەگەر شەڕانگێزییەک رووبدات، ئێمە زۆر دڵنیا نین، پێمانوایە ئەگەری زۆر نییە کە شەڕانگێزی لە دەرەوە رووبدات، بەڵام ئەگەر شەڕانگێزییەک رووبدات، بە دڵنیاییەوە لە بەرامبەر گورزەکەی ئەوان، گورزێکی تووندمان دەبێت."
خامنەیی سەبارەت بە ئەگەری هاندانی دەرەکی بۆ دروستکردنی پشێوی لە ئێرانیش هۆشداری دا و رایگەیاند، "ئەگەر بیر لەوە بکەنەوە کە لە ناوخۆی وڵات فیتنەیەک دەستپێبکەن، وەکو چەند ساڵێک لەمەوبەر کە فیتنەیان دروست کرد، گەلی ئێران خۆی وەڵامیان دەداتەوە، هەر وەکو ئەوەی لە رابردوو وەڵامیان داوەتەوە."
لێدوانی خامنەیی لە کاتێکدایە، هەردوو لایەنی ئێران و ئەمریکا بە فەرمی پشتڕاستیان کردووەتەوە کە دانوستاندنی نێوانیان لە عومان دەستیپێکردووە.
لەگەڵ گەڕانەوەی بۆ کۆشکی سپی، ترەمپ سیاسەتی "ئەوپەڕی گوشار"ـی لە دژی ئێران نوێکردەوە، کە لە خولی یەکەمدا لە دژی بەکاریهێنابوو. لە چوارچێوەی ئەو سیاسەتەدا، ئەمریکا لە ساڵی 2018 لە رێککەوتنی ئەتۆمی کشایەوە.
رێککەوتنەکە لە ساڵی 2015 لەنێوان تاران و وڵاتانی رۆژئاوا دا واژۆ کرابوو. بەپێی ئەو رێککەوتنە، سزا ئابوورییەکانی سەر ئێران هەڵوەشێندرابوونەوە و تارانیش بەرنامە ئەتۆمییەکەی سنووردار کردبوو.
لەم چەند مانگەی دواییدا، تاران دەستی بە هەوڵی دیپلۆماسی کردووە لەگەڵ سێ وڵاتە ئەورووپییەکە (بەریتانیا، فەرەنسا و ئەڵمانیا)، بۆ ئەوەی کێشە ئەتۆمییەکان چارەسەر بکەن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ