رووداو دیجیتاڵ
دوای ئەوەی دۆناڵد ترەمپ هەڕەشەی 'بۆمباران'ـی ئێرانی کرد، تاران دەڵێت، "ئەوە پێشێلکارییەکی گەورەی جاڕنامەی نەتەوە یەکگرتووەکان و دژایەتیکردنی ئاشکرای ئاشتی و ئاسایشی نێودەوڵەتییە".
رۆژی دووشەممە 31ی ئاداری 2025، ئیسماعیل بەقایی، گوتەبێژی وەزارەتی دەرەوەی ئێران لە تۆڕی کۆمەڵایەتیی ئێکس وەڵامی هەڕەشەکانی دۆناڵد ترەمپ، سەرۆکی ئەمریکای دایەوە کە هەڕەشەی هێرشکردنە سەر ئێرانی کردووە.
ئیسماعیل بەقایی لە پەیامەکەیدا دەڵێت: "هەڕەشەی ئاشکرای بۆردومانکردنی ئێران لەلایەن سەرۆکی وڵاتێکەوە دژایەتییەکی ئاشکرایە لەگەڵ جەوهەری ئاشتی و ئاسایشی نێودەوڵەتی."
گوتەبێژی وەزارەتی دەرەوەی ئێران ئاماژەی بەوەدا، وەڵامی هەر هێرش و هەڕەشەیەک دەدەنەوە و گوتی، "تووندوتیژی، تووندوتیژی دەهێنێت و ئاشتی ئاشتی بەدیدەهێنێت. ئەمریکا دەتوانێت هەڵبژێرێت... لەگەڵ شوێنەوار و دەرئەنجامەکانی."
رۆژی یەکشەممە، 30ی ئاداری 2025، دۆناڵد ترەمپ، سەرۆکی ئەمریکا لە چاوپێکەوتنێکدا لەگەڵ کەناڵی ئێن بی سی نیوزی ئەمریکی هەڕەشەی لە کۆماری ئیسلامیی ئێران کرد و رایگەیاند، "ئەگەر لەگەڵ ئێران نەگەینە رێککەوتن و گەرەنتی وەرنەگرین کە ئێران چەکی ئەتۆمی دروست ناکات، ئەوا بۆردوومان روودەدات. ئەم وڵاتە بە شێوەیەک بۆردوومان دەکرێت کە وێنەی نەبووبێت."
ترەمپ هەروەها بە فەرمی دەستپێکردنی دانوستاندنی نێوان تاران - واشنتنی پشتڕاست کردەوە و رایگەیاند، "بەرپرسانی ئێرانی و ئەمریکی خەریکی دانوستاندنن."
رێبەری باڵای کۆماری ئیسلامیی ئێران، ئەمڕۆ لە گوتارێکدا لە دوای نوێژی جەژنی رەمەزان لە تاران، ئاماژەی بە گرژییەکانی نێوان ئێران و ئەمریکا کردەوە و رایگەیاند، هەڵوێستیان نەگۆڕاوە و ئەگەر هێرش بکرێتە سەر ئێران، وەڵامێکی تووندیان دەبێت.
عەلی خامنەیی گوتی: "هەموو لایەک بزانن، هەڵویستمان هەر هەمان هەڵویستی جارانە. دوژمنایەتی ئەمریکا و رژێمی زایۆنیش، هەر هەمان شتە کە جاران هەبوو. هەڕەشە دەکەن کە شەڕانگێزی دەکەن، هەڵبەت ئەگەر شەڕانگێزییەک رووبدات، ئێمە زۆر دڵنیا نین، پێمانوایە ئەگەری زۆر نییە کە شەڕانگێزی لە دەرەوە رووبدات، بەڵام ئەگەر شەڕەنگێزییەک رووبدات، بە دڵنیاییەوە لە بەرامبەر گورزەکەی ئەوان، گورزێکی توندمان دەبێت."
لەگەڵ گەڕانەوەی بۆ کۆشکی سپی، ترەمپ سیاسەتی "ئەوپەڕی گوشار"ـی لە دژی ئێران نوێکردەوە، کە لە خولی یەکەمدا لە دژی بەکاریهێنابوو. لە چوارچێوەی ئەو سیاسەتەدا، ئەمریکا لە ساڵی 2018 لە رێککەوتنی ئەتۆمی کشایەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ