رووداو دیجیتاڵ
وەزیری دەرەوەی ئێران دەڵێت، لە رابردوودا دیپلۆماسی کاریگەریی خۆی لە چارەسەرکردنی کێشەکان سەلماندووە و هێشتاش دەتوانێت کاریگەر بێت؛ رەتیشی دەکاتەوە، بژاردەی سەربازی رێگەچارە بێت بۆ چارەسەرکردنی کێشەکانی نێوان تاران و واشنتن.
عەباس عێراقچی، وەزیری دەرەوەی ئێران لە نووسینێکدا لە تۆڕی کۆمەڵایەتیی ئێکس رایگەیاند: "رەنگە سەرۆکی ئەمەریکا گرنگی بە رێککەوتنە ئەتۆمییەکەی ساڵی 2015 نەدات، بەڵام ئەو رێککەوتنە پابەندبوونێکی سەرەکی ئێران لەخۆدەگرێت کە هێشتا وەک خۆی ماوە و تەنانەت ئەمریکاش کە لە دەرەوەی رێککەوتنەکەیە، لێی سوودمەند بووە."
عێراقچیی دەڵێت: "ئێران دووپاتی دەکاتەوە کە هەرگیز و لە هیچ دۆخێکدا هەوڵ نادات بەدوای چەکی ئەتۆمیدا بگەڕێت، دروستی بکات یان بەدەستی بهێنێت."
وەزیری دەرەوەی ئێران دەشڵێت: "10ساڵ دوای واژۆکردنی رێککەوتنی ئەتۆمی و نزیکەی حەوت ساڵ دوای کشانەوەی ئەمریکا لێی، تەنانەت بچووکترین بەڵگەش نییە دەری بخات ئێران پابەندییەکانی پێشێل کردووە".
بە گوتەی وەزیری دەرەوەی ئێران، کاری دیپلۆماسی لە رابردوودا کاریگەری خۆی سەلماندووە و هێشتاش دەتوانێت کاریگەر بێت، "بەڵام دەبێت بۆ هەمووان روون بکرێتەوە" کە شتێک بە ناوی بژاردەی سەربازی چارەسەری دۆخەکە ناکات.
ئەم هەڵوێستە لە کاتێکدایە، چەند هەفتەیەکە زمانی ئەمریکا بەرامبەر ئێران تووند بووە و ئێرانیش دەڵێت، لە بەرامبەر هەر هێرشێکدا بێ وەڵام نابێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ