رووداو دیجیتاڵ
سەرۆکوەزیرانی ئیسرائیل، فەرماندەی پێشووی هێزی دەریایی، بە سەرۆکی نووسینگەی ئاسایشی نێوخۆی ئیسرائیل (شاباک) هەڵبژارد، وێڕای ئەوەی دادگەی باڵای وڵاتەکە، هێشتا رازینەبووە بە دوورخستنەوەی سەرۆکی ئێستای دەزگاکە.
نووسینگەی سەرۆکوەزیرانی ئیسرائیل لە راگەیێندراوێکدا دەڵێت "دوای چاوپێکەوتنی تێروتەسەل لەگەڵ 7 بەربژێری شایستە، بنیامین نەتەنیاهوو، سەرۆکوەزیرانی ئیسرائیل بڕیاری دا ئیلی شەرڤیت، فەرماندەی پێشووی هێزی دەریایی ئیسرائیل وەک بەڕێوەبەری داهاتووی شاباک دەستنیشان بکات".
شاباک، ئەمڕۆ (دووشەممە) ئاماژەی بەوەشکردووە، شەرڤیت ماوەی 36 ساڵ لە سوپادا کاریکردووە و لەنێویاندا 5 ساڵ فەرماندەی هێزی دەریایی بووە.
لە راگەیێندراوەکەدا هاتووە "لەو پێگەیەدا شەرڤیت سەرکردایەتی بنیاتنانی هێزی بەرگری دەریایی کردووە و ئۆپەراسیۆنی پێشکەوتووی لە دژی حەماس، حیزبوڵڵا و ئێران کردووە".
بەڵام ئەڤیگدۆر لیبەرمان، سەرۆکی پارتی "ئیسرائیل ماڵمانە" رەخنە لە دەستنیشانکردنی شەرڤیت دەگرێت و دەڵێت، "وێڕای ئەوەی سەرکردەیەکی سەربازیی نایاب بووە، هیچ پێشینە یان توانایەکی لە بواری هەواڵگریدا نییە."
حکومەتی نەتەنیاهوو لە 21ـی ئادار بڕیاری دا رۆنێن بار لە پۆستی سەرۆکی شاباک دووربخاتەوە، لەبەرئەوەی نەتەنیاهوو پێیوابوو بار متمانەی لەدەستداوە.
بەڵام دوای ئەو سکاڵایانەی لەلایەن ئۆپۆزیسیۆنی ئیسرائیل و رێکخراوێکی ناحکومییەوە تۆمارکران، دادگەی باڵای بڕیاری حکومەتی سڕ کرد.
بە گوتەی دادگەکە، سڕکردنی بڕیارەکە بەردەوام دەبێت تاوەکو تاوتوێکردنی سکاڵاکان و تانەکانی دژییان، تەواو دەبێت.
گالی بەهاراڤ مایارا، داواکاری گشتیی ئیسرائیل راستەوخۆ دوای بڕیارەکەی 21ـی ئادار رایگەیاندبوو، نەتەنیاهوو "بۆی نییە" سەرۆکێکی نوێ بۆ شاباک دیاری بکات.
بەڵام نەتەنیاهوو پێداگری کرد بڕیاری دەستنیشانکردنی سەرۆکی دەزگای ئاسایشی نێوخۆ لە دەستی حکومەتەکەی ئەودایە.
پەیوەندی بار و حکومەتەکەی نەتەنیاهوو کاتێک تێکچوو، کە بار حکومەتی بە هۆکاری شکستی ئەمنیی بەرامبەر بە هێرشەکەی 7ـی ئۆکتۆبەری 2023ی حەماس زانی.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ