رۆژهەڵاتی نێوەڕاست
ئیتامار بێن گڤیر، وەزیری ئاسایشی نیشتمانیی ئیسرائیل لەناو حەوشەی مزگەوتی ئەقسا (لە دەستە راست)
prev
next
رووداو دیجیتاڵ
وەزیری ئاسایشی نیشتمانیی ئیسرائیل چووە حەوشەی مزگەوتی ئەقسا لە شاری قودس/ ئۆرشەلیم. سعودیە و ئوردن سەرکۆنەی ئەو کارەی بەرپرسە ئیسرائیلییە دەکەن.
رۆژی چوارشەممە 2ی نیسانی 2025 ئیتامار بێن گڤیر، وەزیری ئاسایشی نیشتمانیی ئیسرائیل لەگەڵ ژمارەیەک لە پاسەوانەکانی چوونە حەوشەی مزگەوتی ئەقسا، ئەوەش دوای گەڕانەوەی بۆ پۆستەکەی.
بێن گڤیر وەزیرێکی تووندڕۆ و راستڕۆیە و پاڵپشتیکارێکی گەورەی ئۆپەراسیۆنە سەربازییەکانی وڵاتەکەیەتی لە غەززە، لە کانوونی دووەمی رابردوودا و دوای راگەیاندنی ئاگربەستی غەززە، دەستی لەکار کێشایەوە، ئەوەش وەکو ناڕەزایەتییەک بەرامبەر راگرتنی جەنگ.
بەڵام لەگەڵ دەستپێکردنەوەی ئۆپەراسیۆنەکانی ئیسرائیل لە 18ی مانگی رابردوودا، ئەو وەزیرەش گەڕایەوە بۆ پۆستەکەی.
دوای بڵاوبوونەوەی ڤیدیۆی سەردانەکەی بێن گڤیر بۆ حەوشەی مزگەوتی ئەقسا، وەزارەتی دەرەوەی سعودیە لە راگەیێندراوێکدا سەرکۆنەی ئەو کارەی کرد و رایگەیاند، "بە تووندی سەرکۆنەی هەڵکوتانە سەر مزگەوتی ئەقسا لەلایەن وەزیری ئاسایشی نیشتمانیی ئیسرائیل دەکەین، بە چاودێریی هێزی پۆلیسی داگیرکار."
دواتریش وەزارەتی دەرەوەی ئوردن سەرکۆنەی ئەو سەردانەی وەزیرە ئیسرائیلییەکەی کرد و بە "هەنگاوێكی دنەدان" ناوی برد.
هەرچی بزووتنەوەی حەماسە لە راگەیێندراوێکدا گوتی، ئەو هەنگاوە "پێشهاتێکی مەترسیدارە،" داوای لە فەلەستینییەکان کرد "رووبەڕووی هەر دەستدرێژییەک ببنەوە بۆ بەرگریکردن لە خاک و پیرۆزییەکانمان، لەنێویاندا مزگەوتی ئەقسای پیرۆز."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ