حەسەن دووکانی: دوور و نزیک پەیوەندیم بە بەلەمە نوقمبووەکەوە نییە

 

 

حەسەن دووکانی لەو کەسانەیە چەند رۆژێکە لە لایەن کەسوکاری بەشێک لە کۆچبەرەکانی نێو بەلەمەکەی دەریای نێوەڕاستەوە ناوی دەهێندرێت کە گوایە قاچاخچی کۆچبەرە کوردەکان بووە.

 

گەردوون عومەر، برای هێرۆ عومەر و موژدە عومەر کە دووان لە سەرنشینانی بەلەمەکە بوون و یەکێکیان رزگاری بووە و ئەوی دیکەشیان گیانی لەدەستداوە، رۆژی شەممە 22-6-2024 بە تۆڕی میدیایی رووداوی راگەیاند، حەسەن دووکانی خاوەنی بەلەمەکە بووە، "بەڵام لەگەڵ دوو قاچاخچی دیکە بەناوەکانی (ئ.) و  (ش. ب.) مامەڵەی کردووە و ئەوانیش کوردن". گوتیشی: "ئەو دوو کەسە نەفەرەکانیان داوە بە دوو قاچاخچی دیکە و ئەو دووانەی دیکە سەریان خستوون بۆ نێو بەلەمەکە کە ناویان (س. گ) و (م. هـ.) ـە".

 

حەسەن دووکانی ئەمڕۆ یەکشەممە 23-6-2024 لە گفتوگۆیەکدا لەگەڵ تۆڕی میدیایی رووداو رەتیکردەوە هیچ پەیوەندییەکی بەو رووداوەوە هەبێت. 

 

 

 

حەسەن دووکانی: من دوورونزیک پەیوەندییم بەم رووداوەوە نییە و ئاگاشم لێی نییە. وەک خەڵک، منیش لە تەلەڤزیۆن و ماڵپەڕەکانەوە بیستوومە، بەڵام کاتێک زانیم ناوی من لە کەناڵێک هات، هەر ئەو شەوە چووم بۆ کەناڵەکە بۆ ئەوەی روونکردنەوە بدەم، بەڵام روونکردنەوەکەیان لێ وەرنەگرتم، دواتر لە سۆشیاڵ میدیا بابەتەکە گەورە کرا و زۆر زەق کرایەوە، وێنە و ناوی منیان ناردبوو، تەنانەت وێنەی پاسپۆرتەکەشیان بۆ ناردبوون.

 

 

حەسەن دووکانی: بۆ کەسوکاری یەکێک لەو کۆچبەرانە کە لە ئەڵمانیایە و ناوی گەردوونە، تەنانەت ژمارەکەیم وەرگرت و قسەم لەگەڵ کرد، پێم گوت من ئاگام لەو بابەتە نییە و دەزانم ئەو سەرچاوەیەش کە بە تۆی گوتووە کێیە و لەکوێشەوە ئەو کەیسەی من جووڵێندراوە. (پێم گوت) ئەوەی کە ناوی من هاتووە لەگەڵ خەڵکێکی دیکە، وا دانراوە کێشەیەک بۆ من دروستبکەن. من کێشەیەکی دادگام لەگەڵ پیاوێک هەیە لە رانییە کە ناوی (ع. ن) ە کە بە (ع. ش) ناسراوە و هەموو ئەوە ئەم کێشەیەی دروستکردووە و تەلەفۆنی بۆ کەسوکاری ئەو کۆچبەرانە کردووە و وێنەی خۆم و پاسپۆرتەکەمی بۆ ناردوون، چونکە وێنەی پاسپۆرتی من تەنیا لای ئەو هەیە.

 

 

حەسەن دووکانی: کێشەیەکی کۆمەڵایەتی لەنێوانماندا هەیە؛ ئیشی نەفەر دەکات و قاچاخچییە. کێشەیەکی کۆمەڵایەتی لەگەڵ من هەیە و ئێستاش ئەم بەلەمە نوقم بووە، دەیەوێت ناوی من بزڕێنێت و کێشەیەکی کۆمەڵایەتی، ئەمنی و یاساییم بۆ دروستبکات، بۆیە ناوی منی خستووەتە نێو ناوی ئەو کەسانەوە کە لە لیستەکەدان.

 

 

حەسەن دووکانی: من نازانم ئاگادار بووە یان نا، بەڵام من لە کەناڵەکانەوە بیستوومە. کاتێک زانیم لە کەناڵێک چاوپێکەوتنیان لەگەڵ کەسێک کرد بە ناوی گەردوون و ئەویش ناوی منی هێنا، هەر ئەو شەوە چووم بۆ کەناڵەکە و ویستم روونکردنەوەیان بدەمێ، بەڵام گوتیان ناتوانین روونکردنەوەت لێ وەربگرین.

 

حەسەن دووکانی: بە هیچ شێوەیەک کەسم لێرەوە نەناردووە.

 

 

حەسەن دووکانی: گوتوویانە من بەلەمەکەم ناردووە و ئەو کێشەیان بۆ دروست کردووم.

 

 

حەسەن دووکانی: بەڵێ، چوار بۆ پێنج ساڵ دەبێت کە لە تورکیا کێشەم بۆ دروستبووە. هەر ئەو (ع)ە کە ئێستا ناوی منی زڕاندووە، لەگەڵ تورکمانێک بە ناوی (ع) لە تورکیا کێشەیەکی سیاسییان بۆ دروستکردم و لەوێ منیان بە ناوی پەکەکە ناساند، کە گوایە کار بۆ پەکەکە دەکەم و سەر بە پەکەکەم، بەڵام کە لە تورکیا گیرام، دوای ئەوەی لە بابەتەکەیان کۆڵییەوە، قسەکان راست دەرنەچوون و سەر لە بەری قسەکانیان درۆ دەرچوون. من بۆ ماوەی ساڵ و نیوێک بۆ دوو ساڵ سەفەرکردنم لێ قەدەخەکرا و نەمتوانی بگەڕێمەوە بۆ عێراق و دەبوایە هەفتانە دوو واژۆ بکەم. دواتر گەڕامەوە و پاریش هەوڵیان دا کاتێک بەلەمێکی دیکە نوقم بوو کێشەم بۆ دروستبکەن و تەلەفۆنیان بۆ کەسوکاری کۆچبەرەکان کردبوو و گوتبوویان من لە پشت ئەو بابەتەوەم، کە ئەوەش سەری نەگرت بۆیان. ئێستاش ئەمەیان دروستکردووە و تەلەفۆنیان بۆ کەسوکاری کۆچبەرەکان کردووە و وێنەی خۆم و پاسپۆرتەکەمیان بۆ ناردوون. ئەو گەردوونە لە کەناڵێک وێنە و پاسپۆرتی منی پیشانداوە. ئەوە ئەو (ع . ن) ە ناردوویەتی و دوورە لە راستییەوە. من دوور و نزیک پەیوەندیم بەو بەلەمەوە نییە و هیج ئاگاداری نیم. من لە عێراقم، هەر کەسێک شتێکی لەسەر من هەیە، ئامادەم بچمە دادگا و روونکردنەوەی خۆم بدەم و هەر لایەنێکی ئەمنیش پەیوەندیم پێوە بکات، دەچم بە دەمیەوە.

 

 

حەسەن دووکانی: نا، لەبەر ئەوەی تاوەکو ئێستا دەوام نییە و هیچ هۆکارێکیش نییە؛ هیچ کەس پەیوەندی پێوە نەکردووم. هەر کەسێکیش تەلەفۆنم بۆ بکات، ئامادەم وەڵامی بدەمەوە و تەلەفۆنیشم کراوەیە و هیچ خۆم نەشاردووەتەوە. کێشەکەی من کۆمەڵایەتییە و دەیانەوێ بیکەن بە کێشەیەکی دیکە. ئینجا ناوی کەسانێکیش دەهێنرێت لەم کەیسەی من کە گوایە دەستی منی لە پشتە. ئەوە دوورە لە راستییەوە و دادگە لە هەر کاتێکدا ئاگادارم بکاتەوە، من دەچم بۆ دادگە.

 

 

حەسەن دووکانی: نزیکەی دوو ساڵ دەبێت لێم قەدەخە کراوە بچم بۆ تورکیا و قەدەخەکەش تاوەکو پێنج ساڵە. بەڵگەکانیشم هەموو لایە.

 

 

حەسەن دووکانی: منیش وەک ئێوە لە سۆشیاڵ میدیا بیستوومە و هیچ زانیارییەکم لەبارەیەوە نییە. چۆن رۆیشتوون و کێ ناردوونی و کێ نەیناردوون، زانیاریم نییە. ئەو کاک گەردوونەش کە لە تەلەڤزیۆن چاوپێکەوتنیان لەگەڵ کرد، خۆی دەڵێت کە کەسوکارەکەی لە رێگەی کوڕێکی کرماشانی و کوڕێکی بۆکانییەوە رۆیشتوون و ناویشیان دەهێنێت کە پێشەکی پارەکەیان پێداون. ئەوە هیچ پەیوەندییەکی بە منەوە نییە و ناوی من لە زیادە دەهێنێت. تەلەفۆنیشم بۆ کرد و روونکردنەوەم پێدا.

 

 

حەسەن دووکانی: گوتی کەسێک وێنە و ناوی تۆی بۆ ناردووم و گوتوویەتی ئەوەشیان لەگەڵدایە. گوتم ئەو کەسە کێیە، پێی نەگوتم، زۆرم هەوڵم لەگەڵی دا؛ گوتی ئەو ژمارەیەی منت چۆن دەستکەوتووە، منیش هەر بەو شێوەیە ناوی تۆم دەستکەوتووە. خۆ ئەو بابەتە زۆر ئاسانە. ئەو کۆچبەرانە کە رۆیشتوون، کەسوکاریان دەزانن بۆ لای کێ چوون و پارەیان بۆ کێ داناوە و کێ دەیانبات، قسەیان لەگەڵ کێ کردووە، دوای ئەوەی رۆیشتوون زانیارییان لە کێ وەرگرتووە. کەسوکاریان هەموو شتەکان دەزانن، ئیدی با بۆ خۆیان بێن و روونکردنەوە بدەن و شتەکان بڵێن. خۆیان زۆر باش دەزانن کێ بردوونی و چۆنیش رۆیشتوون. دوای رۆیشتنەکەش زانیارییەکانیان لە کێ وەرگرتووە. بۆ خۆیان باش دەزانن کێ بردوونی و هیوادارم خەڵکی دیکە لەو بابەتە وەرنەدەن. لەوانەیە من کێشەیەکی کۆمەڵایەتیم هەبێت و یەکێکی وەکو (ع. ش) بیەوێ تاوانبارم بکات.

 

 

حەسەن دووکانی: بەڵێ تۆمارم کردووە و سکاڵاکەم ئامادەیە و دەیبەم بۆ دادگا. سکاڵام لەسەری هەیە و بەڵگەشم هەیە کە ناوی منی زڕاندووە. یەک دوو رۆژ پێش ئەوەی ئەم یەختە نوقم بێت، لە ماڵپەڕێکدا باسی منی کردووە، واتە دۆسیەکەی منی وا لێکردووە. ئێستا کەسوکاری ئەم کۆچبەرانە دڵیان گەرمە. ئەو مادەیەکی هەیە کە پێشتر سکاڵای لەسەر من تۆمار کردووە، ئێستا دەیهێنێت و تێکەڵاوی ئەم بەلەمە نوقمبووەی دەکات بۆ ئەوەی ناوی من بزڕێنێت.