سکرتێری UN داوای پێکهێنانی حکومەتێکی بنکەفراوان لە لایەنە سیاسییەکانی هەرێمی کوردستان دەکات

 

 

رۆژی سێشەممە 22ی تشرینی یەکەمی 2024 فەرحان حەق، جێگری گوتەبێژی سکرتێری گشتیی نەتەوە یەکگرتووەکان لە کۆنفرانسێکی رۆژنامەڤانیدا کە سینان تونجدەمیر، بەرپرسی نووسینگەی تۆڕی میدیایی رووداو لە نیویۆرک ئامادە بوو، رایگەیاند، "سکرتێری گشتی پیرۆزبایی لە هەرێمی کوردستانی عێراق و خەڵکەکەی دەکات بەبۆنەی بەڕێوەچوونی هەڵبژاردنی گشتیی پەرلەمانی لە 20ی تشرینی یەکەم، کە لە کەشێکی ئارام و ئاشتییانەدا بەڕێوەچوو."

 

فەرحان حەق ئاماژە بەوەش دەکات، سکرتێری گشتیی نەتەوە یەکگرتووەکان ستایشی هەوڵەکانی کۆمیسیۆنی باڵای سەربەخۆی هەڵبژاردنەکانی عێراق دەکات لە ئامادەکاری و بەڕێوەبردنی هەڵبژاردن.

 

جێگری گوتەبێژی سکرتێری گشتیی نەتەوە یەکگرتووەکان دەڵێت، ئەنتۆنیۆ گۆتیرێز "هانی هەموو سەرکردە سیاسییەکان و پێکهاتەکانی کۆمەڵگە دەدات، ئەو دۆخە ئاشتییە بهێڵنەوە و هانی لایەنە سیاسییەکانیش دەدات هەر ناکۆکییەکیان لەبارەی پرۆسەکەوە هەیە لە رێگەی کەناڵە یاساییەکانەوە چارەسەری بکەن و پرۆسەی هەڵبژاردن تەواو بکەن، ئەوەش لە رێگەی پێکهێنانی حکومەتێکی بنکەفراوان بەزووترین کات."

 

فەرحان حەق دەڵێت، "سکرتێری گشتی جەخت لە پابەندبوونی نەتەوە یەکگرتووەکان بۆ پاڵپشتیکردن لە هەوڵەکانی عێراق لە پتەوکردنی دەستکەوتە دیموکراسییەکانی و بونیاتنانی داهاتوویەکی خۆشگوزاران بۆ خەڵکی عێراق دەکاتەوە."

 

 

"لێدوانێکم بۆ ئێوە هەیە لەبارەی هەڵبژارنی پەرلەمانی هەرێمی کوردستانی عیراق. سکرتێری گشتی پیرۆزبایی لە هەرێمی کوردستانی عێراق و خەڵکەکەی دەکات بەبۆنەی بەڕێوەچوونی هەڵبژاردنی گشتی پەرلەمانی لە 20ی تشرینی یەکەم، کە لە کەشێکی ئارام و ئاشتیانەدا بەڕێوەچوو. سکرتێری گشتی ستایشی هەوڵەکانی کۆمیسیۆنی باڵای سەربەخۆی هەڵبژاردنەکانی عێراق دەکات لە ئامادەکاری و بەڕێوەبردنی هەڵبژاردن. لە کاتێکدا هەرێمی کوردستانی عێراق چاوەڕێی ئەنجامی کۆتایی هەڵبژاردنە. سکرتێری گشتی هانی هەموو سەرکردە سیاسییەکان و پێکهاتەکانی کۆمەڵگە دەدات، ئەو دۆخە ئاشتییە بهێڵنەوە و هانی لایەنە سیاسییەکانیش دەدات کە هەر ناکۆکییەکیان لەبارەی پرۆسەکە هەیە لە رێگەی کەناڵە یاساییەکانەوە چارەسەری بکەن و پرۆسەی هەڵبژاردن تەواو بکەن، ئەوەش لە رێگەی پێکهێنانی حکومەتێکی بنکەفراوان بە زووترین کات. سکرتێری گشتی جەخت لە پابەندبوونی نەتەوە یەکگرتووەکان بۆ پاڵپشتیکردن لە هەوڵەکانی عێراق لە پتەوکردنی دەستکەوتە دیموکراسییەکانی و بونیاتنانی داهاتوویەتی خۆشگوزاران بۆ خەڵکی عێراق دەکاتەوە."