رووداو دیجیتاڵ
ماوەی پێنج رۆژە دوو گەنجی شاری هەولێر بەیەکەوە چوونەتە دەرەوە و نەگەڕاونەتەوە. کەسوکاری دوو گەنجەکە دەڵێن، هیچ لەبارەی شوێنی کوڕەکانیان نازانن. دوو گەنجەکە یەکێکیان دانیشتووی هەولێر و یەکێکیشیان دانیشتووی کۆمەڵگەی بەستۆرەیە.
ئەو دوو گەنجە یەکێکیان ناوی ئەحمەد تاڵیبە، تەمەنی 19 ساڵە و دانیشتووی کۆمەڵگەی بەستۆرەیە، ئەوەی دیکەشیان ناوی محەممەد نەهرۆیە و تەمەنی 26 ساڵە و دانیشتووی سەنتەری شاری هەولێرە. هەردووکیان لە رۆژی 16-01-2023 لە ماڵ دەرچوون و نەگەڕاونەتەوە.
تالیب قادر، باوکی ئەحمەد بە تۆڕی میدیایی رووداوی راگەیاند: "کوڕەکەم لەگەڵ هاوڕێیەکی بە ناوی محەممەد کە هاتووەتە شوێنی و بەیەکەوە چوون دیار نەماوە، ڤیدیۆی کامێراکانی چاودێرییمان تەماشاکردووە لە بەستۆرە دەرچوون تاوەکو گەیشتوونەتە مەفرەقی بەستۆرە و لای پردەکەش لە کامێرا دەردەکەون و دواتریش دیار نامێنن."
باوکی ئەحمەد هێزە ئەمنییەکانی لە ونبوونی کوڕەکەی ئاگادار کردووەتەوە و بەنیازیشە سکاڵا لەسەر خێزانی محەممەد تۆمار بکات، چونکە بە گوتەی ئەو، کوڕی ئەو ماڵە بەشوێنیدا هاتووە، لەگەڵ ئەو ماڵەشدا قسەیان کردووە و ئەوانیش دەڵێن: دەگەڕێن بەدوایاندا، بەڵام هێشتا نازانن ئەو دوو کوڕە لەکوێن، تەنیا لە سناپ چات هەن و نامەکان دەبینن و وەڵامنادەنەوە.
بە گوتەی باوکی ئەحمەد، محەممەد و کوڕەکەی ماوەی سێ مانگێک پێکەوە لە مارکێتێک کاریان کردووە و دەڵێت: "نازانین بۆ رۆیشتوون و لەکوێن، داواکارین هەرکەس سۆراخیان دەزانێت یان شوێنیان دەزانێت ئاگادارمان بکاتەوە."
سامی سەباح، کە ئامۆزای محەممەدە، بە رووداوی گوت: "ئێمە هیچ ناخۆشییەکمان لەگەڵ ماڵی ئەحمەد نییە، ئەو دوو کوڕەی ئێمە و ئەوان هاوڕێ بوون و پێکەوە کاریان کردووە، ئەوان بەپێی ئەوەی پێمانگەیشتووە گوتوویانە بەنیازن بچنە دەرەوەی وڵات، بەڵام ئەو رۆژە محەممەد بە دایکی گوتووە کارێکی دۆزیوەتەوە و بەو بیانووە لە ماڵەوە چووەتە دەرەوە."
سامی سەباح باسی ئەوەشی کرد کە محەممەد هیچ ناسنامەیەکی پێنەبووە، گوتیشی: "ئێمەش لەلایەن خۆمانەوە بنکەکانی پۆلیسیمان ئاگادارکردووەتەوە کە هەرکەس زانیاریی لەبارەی شوێنیانەوە هەیە ئاگادارمان بکاتەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ