رووداو دیجیتاڵ
دوێنێ یەکشەممە هاونیشتمانییەک بە ناوی ژاڵە فارووق لە شاری هەولێر لە کاتی منداڵبوون لە نەخۆشخانەیەکی تایبەت گیانی لەدەستدا. براکەی دەڵێت، "خوشکەکەم لەگەڵ پزیشکەکەی قسەی کردبوو و دەبووایە کاژێر 7:00ـی بەیانی لە نەخۆشخانە بوونایە، بەڵام پزیشکەکەی لە کاتی دیاریکراودا نەگەیشت. خوشکەکەم کاژێر 11:00ـی پێشنیوەرۆ تووشی خوێنبەربوون بوو، ئەو کات پزیشکەکەی گەیشتە نەخۆشخانە."
رۆژی دووشەممە، 19-06-2023 ئارام فارووق، برای ژاڵە فارووق بە تۆڕی میدیایی رووداوی گوت، "رۆژی شەممە 17ـی ئەم مانگە خوشکەکەم تاوەکو کاژێر 11:00ـی شەو لە ماڵی باوکم بووە، دواتر کاژێر 3:00ـی بەرەبەیانی رۆژی یەکشەممە سەردانی نەخۆشخانەیەکی تایبەتی کردووە بۆ ئەوەی منداڵی ببێت. ئەو لەگەڵ پزیشکەکەی خۆی کاژێر 7:00ـی بەیانی بۆ یەکدی بینین و منداڵبوونەکە داناوە، بەڵام پزیشکەکەی لە نەخۆشخانە ئامادە نەبووە."
بڕیار بووە ژاڵە فارووق بە سرووشتی منداڵی ببێت. براکەی دەڵێت، "کاژێر 7:00ـی بەیانی خوشکم بردراوە ژوورەوە و منداڵی بوو و هەموو شتێک باش بوو، بەڵام لە پڕ تووشی خوێنبەربوون بوو. بۆ ئەوەی چارەسەر بکرێت زیاتر لە 10 جار پەیوەندیمان بە پزیشکەکەی کرد، بەڵام وەڵامی نەداینەوە، دواتر کاژێر 11:00ـی پێش نیوەڕۆ سەردانی نەخۆشخانەی کرد."
بە گوتەی براکەی، دوای ئەوەی ژاڵەی خوشکی تووشی خوێنبەربوون دەبێت نزیکەی 40 بوتڵ خوێنی بۆ دەهێنن لە نەخۆشخانەی رزگاری و دەڵێت، "بە پزیشکەکەمان گوت بۆچی زووتر و لە کاتی خۆی سەردانی خوشکەکەمت نەکرد؟ بۆچی لە نەخۆشخانە نەبوویت؟ وەڵامی ئەویش ئەوە بوو کە "هەر ئێوە نەخۆشتان نییە؛ نەخۆشی دیکەش هەبووە".
ئارام فارووق دەڵێت، "خوشکم خوێنی کەم بووە و ئاگاداری پزیشکەکەی کردبووەوە کە ئەو کێشەی هەیە، جگە لەوە هیچ کیشەیەکی تەندروستی نەبووە، بەڵام درەنگ بە هانایەوە هاتن."
ژاڵە فارووق تەمەنی 34 ساڵ و خاوەنی سێ منداڵە. براکەی دەڵێت، سکاڵایان تۆمارکردووە و دەشڵێت: "کەسوکاری ئەو پزیشکە سەردانی ماڵی ئامۆزایەکی باوکمیان کردووە بۆ ئەوەی لێیان خۆشبین."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ