رووداو دیجیتاڵ
گوتەبێژی پۆلیسی سلێمانی دەڵێت، لەسەر سكاڵای باوكی كچێک، تۆمەتبارێکیان دەستگیركرد، كە هەڕەشەی بڵاوكردنەوەی وێنە و ڤیدیۆی كەسی لە كچەکە كردبوو، لە هەمانکاتدا لەژێر هەڕەشەدا پارەیەکی زۆری لێوەرگرتبوو.
رۆژی پێنجشەممە، 11-05-2023، سەرکەوت ئەحمەد، گوتەبێژی پۆلیسی سلێمانی بە تۆڕی میدیایی رووداوی گوت، ئەو تۆمەتبارە لەسەر سکاڵای باوکی کچێک دەستگیرکرا، گوایە هەڕەشەی بڵاوکردنەوەی وێنە و ڤیدیۆی کەسیی لە کچەکەی کردبوو، چەند جارێكیش دەستدرێژیی كردووەتەسەر و لەژێر هەڕەشەشدا پارەی لێوەرگرتبوو.
بە گوتەی سەرکەوت ئەحمەد، کچەکە ئەو کوڕەی ناسیوە و پەیوەندییان هەبووە و چەندینجار پێیگوتووە هاوسەرگیری لەگەڵ دەکات، بەڵام دواتر هەڕەشەی لێکردووە، ئەویش باوکی ئاگادار کردووەتەوە و باوکیشی سکاڵای تۆمار کردووە.
گوتەبێژی پۆلیسی سلێمانی دەڵێت: "دوای لێکۆڵینەوەکان توانرا تۆمەتبار بدۆزرێتەوە و لەلایەن بنكەی پۆلیسی ئەزمەڕەوە دەستگیر بكرێت و دەستیش بگیرێت بەسەر بڕی 21 هەزار و 100 دۆلار و بڕێک دیناری عیراقیدا كە تۆمەتبار لەژێر هەڕەشەدا لەكچەكەی وەرگرتبوو."
تۆمەتبارەکە ناوی (م،ج،ح)ـە و لەدایكبووی 2003یە، بە بڕیاری دادوەر راگیراوە و لێكۆڵینەوەكان لەگەڵیدا بەردەوامە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ