رووداو دیجیتاڵ
بەڕێوەبەرایەتیی گشتیی كەشناسی و بومەلەرزەزانیی هەریمی کوردستان رایگەیاند، لە رۆژی دووشەممەی هەفتەی داهاتووەوە تاوەکو کۆتایی هەفتەکە شەپۆلێکی بارانباراین پارێزگاکانی هەرێمی کوردستان دەگرێتەوە. کەشناسیی عێراقیش دەڵێت: "هەفتەی داهاتوو بارانبارین لە پارێزگاکانی ناوەڕاست و باشووری عێراق دەستپێدەکاتەوە و بۆ ماوەی سێ رۆژ بەردەوام دەبێت."
بەڕێوەبەرایەتیی گشتیی كەشناسی و بومەلەرزەزانیی هەرێمی کوردستان بە پشتبەستن بە پێشبینییەکان زانیاریی لەبارەی شەپۆلێکی بارانبارینەوە دەدات و لە راگەیێندراوێکدا دەڵێت: "لە ئەنجامى یەکگرتنى هەردوو نزمە پاڵەپەستۆى دەریاى ناوەڕاست و تورکیا لە ماوەى نێوان رۆژى دووشەممە تاوەکو رۆژى هەینیی هەفتەى داهاتوو شەپۆلێکى بارانبارین روو لە ناوچەکەمان دەکات و سەرجەم ناوچەکان دەگرێتەوە."
بەگوێرەی راگەیێندراوەکە، "رۆژى دووشەممە سەرەتا بارانی کەم لە ناوچە جیاجیاکاندا دەبارێت، بەگوێرەى نەخشەکانى بارانى پێشبینیکراو رۆژى سێشەممە و چوارشەممە شەپۆلى بارانبارین بەهێز دەبێت و دەبێتە لێزمە باران و هەورە تریشقە، هەندێک کات بەرزبوونەوەى ئاستى ئاویش لە ناوچەکەمان دەبێت، جگە لە نزمبوونەوەى پلەکانى گەرما."
رۆژی هەینی 7-4-2023، عامر جابری، گوتەبێژی دەستەی کەشناسی و بوومەلەرزەزانیی عێراق بە تۆڕی میدیایی رووداوی راگەیاند: "پێشبینی دەکرێت لە رۆژی دووشەممە و سێشەممەی هەفتەی داهاتوو شەپۆلێکی بارانبارین روو لە سەرجەم پارێزگاکانی عێراق بە هەرێمی کوردستانیشەوە بکات، بەڵام شەپۆلەکە لە پارێزگاکانی ناوەڕاست و باشووری عێراق زیاتر دەبێت و ئاستی بارانبارین لەو پارێزگایانە زیاتر دەبێت."
بەپێی گوتەی عامر جابری، بارانبارین بەدرێژایی مانگی رەمەزاندا پێشبینی کراو دەبێت و پلەی گەرماش بەنزمی دەمێنێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ