رووداو دیجیتاڵ
لە دوو رووداوی هاتووچۆدا لە مهابادی سەر بە پارێزگای ورمێی رۆژهەڵاتی کوردستان دوو کەس گیانیان لەدەستدا و دوو کەسی دیکەش بریندار بوون.
هەردوو رووداوەکە شەوی پێنجشەممە، 03-08-2023 روویاندا. رووداوی یەکەم لە سەر رێگەی مەهاباد- میاندۆئاو و رووداوی دووەم لە سەر رێگەی مەهاباد- بۆکان بووە.
کەمال ئاهمەند، جێگری ناوەندی فریاکەوتنی خێرای نەخۆشخانەی مەهاباد رایگەیاند، رووداوی یەکەم لە نێوان ئۆتۆمبێلێکی تایبەت و مۆتۆرسکیلێکدا بووە و لە ئەنجامدا کەسێک گیانی لەدەستداوە و دوو کەسیش بریندار بوون.
کەمال ئاهمەند گوتی، لە رووداوێکی دیکەدا ئۆتۆمبێلێکی تایبەت لەسەر رێگەی مەهاباد-بۆکان و لە نزیکی گوندی بورهان وەرگەڕاوە و لە ئەنجامدا کەسێک گیانی لەدەستداوە.
لە مانگی رابردوودا، لە رێگەی نێوان مهاباد-بۆکان و مهاباد-میاندۆئاو 10 کەس بە رووداوی هاتووچۆ گیانیان لەدەستداوە و 30 کەسیش بریندار بوونە.
لەم ماوەیەی دواییدا رووداوەکانی هاتووچۆ لە پارێزگای ورمێی رۆژهەڵاتی کوردستان روو لە زیاد بوون بووە، لە 30-7-2023 لە رووداوێکی هاتووچۆدا لە رێگەی نێوان ورمێ-سەلماس دوو کەس گیانیان لەدەستدا و کەسێکیش بریندار ببوو.
کەمال هادیانفەر، بەڕێوەبەری گشتیی پۆلیسی هاتووچۆی ئێران رۆژی یەکشەممە، 30-7-2023 لە لێدوانێکدا بۆ میدیای فەرمیی وڵاتەکەی رایگەیاندبوو، رۆژانە لە نێوان 50 بۆ 60 کەس لە ئێران بە رووداوی هاتووچۆ گیان لەدەستدەدەن و هۆکاری سەرەکیی رووداوەکانیش نەبوونی مەرجی سەلامەتیی ئۆتۆمبێلەکانە.
کەمال هادیانفەر گوتبووی، لە 21-03-2022 تاوەکو 21-03-2023 زیاتر لە 20 هەزار کەس لە ئێران بە رووداوی هاتووچۆ گیانیان لەدەستداوە و 378 هەزار کەسیش برینداربوون، لەو ژمارەیەش 49٪یان لەکاتی رووداوەکان یان لە رێگەی نەخۆشخانە گیانیان لەدەستداوە کە ئەوەش واتای نەبوونی مەرجی سەلامەتییە لە ئۆتۆمبێلەکان.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ