مەسرور بارزانی: دەبێت رێگری بکرێت لە دەستدرێژیکردنە سەر موڵکی کورد لە ناوچە کوردستانییەکان

 

 

رۆژی دووشەممە 2021/02/01 مەسرور بارزانی، سەرۆکوەزیرانی هەرێمی کوردستان پێشوازیی لە سالار عەبدولستار، وەزیری دادی عێراق کرد.

 

لە کۆبوونەوەکەدا باس لە پەرەدان بە هاوئاهەنگی و هاوکاریی نێوان دەسەڵاتی دادوەری و دادگەکان و دەزگا پەیوەندیدارەکانی هەرێمی کوردستان و حکومەتی عێراق کرا.

 

هاوکات باس لە گرنگیی هاوئاهەنگیکردن و ئامادەبوون لە کۆڕ و نێوەندە نێودەوڵەتییەکاندا کرا.

 

هەروەها سەرۆکوەزیرانی هەرێمی کوردستان جەختی لە قەرەبووکردنەوەی زیانلێکەوتووان و کەسوکاری شاڵاوەکانی ئەنفال و کیمیاباران و خاپوورکردنی هەزاران و گوندی کوردستان لەلایەن رژێمی پێشووی عێراقەوە کرد.

 

مەسرور بارزانی داوای کرد کە وەزارەتی داد و دامودەزگا دادوەرییەکانی عێراق رۆڵی خۆیان بگێڕن لە سنووردانان و رێگریکردن لەو کارە نایاسایی و دەستدرێژییانەی دەکرێنە سەر ماڵ و زەویی هاونیشتمانییانی کورد لە ناوجە کوردستانییەکانی دەرەوەی ئیدارەی حکومەتی هەرێمی کوردستان.

 

سەرۆکوەزیرانی هەرێمی کوردستان بە پێویستی زانی کە کار بۆ نەهێشتنی سیاسەتی گۆڕینی دیموگرافیای ئەو ناوچانە بکرێت.