رووداو دیجیتاڵ
شاندێکی وەزارەتی تەندروستیی هەرێمی کوردستان گەیشتە بەغدا و بڕیارە لەگەڵ سەرۆکوەزیرانی عێراق و وەزیری تەندروستیی عێراق کۆببنەوە. بەرپرسێکی وەزارەتی تەندروستی دەڵێت، "سەردانەکە لەبارەی دەرمان، دابینکردنی ئامێر و کەرەستەی پزیشکییە."
رۆژی دووشەممە 16-10-2023 دکتۆر کاوە خەلیل، بەڕێوەبەری گشتیی کاروباری تەندروستی لە وەزارەتی تەندروستیی هەرێمی کوردستان بە تۆڕی میدیایی رووداوی گوت، "شاندێکی وەزارەت سەردانی بەغدامان کردووە و پلانەکە وایە ئەمڕۆ لەگەڵ محەممەد شیاع سوودانی، سەرۆکوەزیرانی عێراق و ساڵح حەسناوی، وەزیری تەندروستی عێراق کۆببینەوە."
لەبارەی هۆکاری سەردانەکە، بەڕێوەبەری گشتیی کاروباری تەندروستی دەڵێت، "کۆبوونەوەکە تایبەت بە دەرمان، پێداویستی و کەرەستەی پزیشکییە؛ هەروەها هەندێک پڕۆژەی نیشتمانی لە عێراق جێبەجێ دەکرێن و داوا دەکەین لە هەرێمی کوردستانیش جێبەجێ بکرێن."
دکتۆر کاوە خەلیل ئاماژەی بەوەشکرد، "لە بودجەی تایبەت بە هەرێمی کوردستاندا کێشەمان هەیە و دابینکردنی کەرەستەی پزیشکی و تەندروستی تێدا نییە. بۆ نموونە، بودجەی تایبەت بە دەرمان هەیە و بۆ ماوەی چەندین ساڵ لەو چوارچێوەیەدا ئامێر و کەرەستەی پزیشکی و دەرمان دەنێردران، بەڵام شەش ساڵە ئامێری پزیشکییان لێ دەرهێناوە و تەنیا دەرمان دەنێرن؛ بۆیە مەبەستمانە ئەو ئامێر و کەرەستانە لە چوارچێوەی بودجەدا بۆمان بنێردرێنەوە."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ