Eshed Şeybanî û Nêçîrvan Barzanî / Wêne: Rûdaw
Hewlêr (Rûdaw) - Serokê Herêma Kurdistanê Nêçîrvan Barzanî û Wezîrê Karên Derve yê Sûriyeyê Eshed Şeybanî civiya.
Konferansa Ewlehiyê ya Munîhê (MSC) doh dest pê kir û Serokê Herêma Kurdistanê jî yek ji beşdaran e.
Nêçîrvan Barzanî di çarçoveya konferansê de bi Wezîrê Karên Derve yê Sûriyeyê Eshed Şeybanî re rûnişt.
Serokatiya Herêma Kurdistanê li ser civînê daxuyaniyek belav kir.
Serokatiya Herêma Kurdistanê ragihand:
“Di civînê de rewşa siyasî û ewlehiya Sûriye û Îraqê û xurtkirina aramiya herêmê hatin nirxandin.
Her wiha rewşa pêkhateyên Sûriyeyê û girîngiya parastina mafên wan û beşdariya wan a di paşeroja welêt de hatin gotûbêjkirin.”
Serokatiya Herêma Kurdistanê di daxuyaniya xwe de anî ziman:
“Serok Nêçîrvan Barzanî tekezî li ser parastina mafên gelê Kurd û hemû pêkhateyan li Sûriyeyê û girîngiya avakirina aştî û aramiyê kir.
Her wiha amaje bi pêwîstiya çareserkirina pirsgirêkan a bi rêya diyalog, têgihîştinê û xebatê ji bo paşerojeke aram a hemû pêkhateyên Sûriyeyê kir.”
Li aliyê din, Eshed Şeybanî pêbendiya Sûriyeyê ya ji bo pêkanîna aramî û rewşeke guncaw a diyaloga niştimanî dubare kir.
Her wiha tekezî li ser daxwaza Sûriyeyê ya ji bo xurtkirina pêwendiyên bi Îraq û Herêma Kurdistanê re û xurtkirina hevkariya ji bo rûbirûbûna astengiyan kir.
Konferansa Ewlehiyê ya Munîhê
Konferansa Ewlehiyê ya Munîhê (MSC) îsal cara 61ê di navbera 14-16ê Sibatê de tê lidarxistin.
Di rojeva konferansê de “plana aştiyê ya Donald Trump a ji bo Ukraynayê” û “rewşa Rojhilata Navîn” dê cih bigirin.
Konferansa Ewlehiyê ya Munîhê (MSC) dê di warê ewlehî û siyaseta derve de bibe mazûvana nîqaşên girîng ên cîhanî.
MSC yek ji konferansên herî girîng ên ewlehiyê yên cîhanê ye û cara ewil sala 1963yan hatibû lidarxistin.
Her sal bi sedan rêberên girîng ên cîhanê beşdarî vê konferansê dibin û pirsgirêk û gef û metirsiyên ewlehiyê yên cîhanî dinirxînin.
Konferans di nêzîkkirina perspektîvên cuda û zêdekirina baweriya di navbera welatan de roleke girîng dilîze.
Serokê Herêma Kurdistanê Nêçîrvan Barzanî li Munîhê bi Wezîrê Karên Derve yê Sûriyeyê Eshed Hesen Şeybanî re hevdîtinek kir#MSC2025 pic.twitter.com/txcYtO5rw4
— RudawKurdi (@RudawKurdi) February 15, 2025
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse