David Lammy û Nêçîrvan Barzanî / Wêne: Rûdaw
Hewlêr (Rûdaw) - Serokê Herêma Kurdistanê ragihand ku wan civîneke baş bi Wezîrê Karên Derve yê Brîtanyayê re pêk aniye.
Konferansa Ewlehiyê ya Munîhê (MSC) doh dest pê kir û Serokê Herêma Kurdistanê jî yek ji beşdaran e.
Nêçîrvan Barzanî di çarçoveya konferansê de bi Wezîrê Karên Derve yê Brîtanyayê David Lammy re rûnişt.
Serokatiya Herêma Kurdistanê li ser civînê daxuyaniyek belav kir.
Serokê Herêma Kurdistanê Nêçîrvan Barzanî derbarê civînê li ser Xê got:
“Me behsa xurtkirina pêwendiyên Îraq, Herêma Kurdistanê yên bi Brîtanyayê re û hewlên hevbeş ên ji bo rûbirûbûna astengiyan kir.
Min ji bo piştgiriyên berdewam spasiya Wezîrê Karên Derve yê Brîtanyayê kir.”
Serokatiya Herêma Kurdistanê jî anî ziman:
“Di civînê de pêwendiyên Brîtanyayê yên bi Îraq û Herêma Kurdistanê re hatin nîqaşkirin.
Her wiha behsa xurtkirina hevkariyê ya di warên siyasî, ewlehî û aborî de hat kirin.”
Di civîna dualî de “Serok Nêçîrvan Barzanî bi taybetî di warê têkoşîna li dijî terorê û bipêşvebirina dezgehên ewlehiyê de spasiya xwe ji bo piştgiriya berdewam a Brîtanyayê ya ji bo Îraq û Herêma Kurdistanê anî ziman.
Her wiha tekezî li ser girîngiya berdewamiya vê piştgiriyê ji bo misogerkirina aramiyê li herêmê kir.”
Wezîr David Lammy jî “pêbendiya Brîtanyayê ya ji bo xurtkirina pêwendiyan bi Îraq û Herêma Kurdistanê re dupat kir û ragihand ku Brîtanya dê di piştgiriya Herêma Kurdistanê de berdewam be.
Her wiha amaje bi girîngiya hevahengiya di mijarên herêmî û rûbirûbûna astengiyên ewlehî û aborî de kir.”
Hilbijartinên parlamentoyê û hewlên pêkanîna Hikûmeta Herêma Kurdistanê, rewşa Sûriyeyê û pêşhatên dawiyê yên herêmê, mijarên din ên civînê bûn.
Konferansa Ewlehiyê ya Munîhê
Konferansa Ewlehiyê ya Munîhê (MSC) îsal cara 61ê di navbera 14-16ê Sibatê de tê lidarxistin.
Di rojeva konferansê de “plana aştiyê ya Donald Trump a ji bo Ukraynayê” û “rewşa Rojhilata Navîn” dê cih bigirin.
Konferansa Ewlehiyê ya Munîhê (MSC) dê di warê ewlehî û siyaseta derve de bibe mazûvana nîqaşên girîng ên cîhanî.
MSC yek ji konferansên herî girîng ên ewlehiyê yên cîhanê ye û cara ewil sala 1963yan hatibû lidarxistin.
Her sal bi sedan rêberên girîng ên cîhanê beşdarî vê konferansê dibin û pirsgirêk û gef û metirsiyên ewlehiyê yên cîhanî dinirxînin.
Konferans di nêzîkkirina perspektîvên cuda û zêdekirina baweriya di navbera welatan de roleke girîng dilîze.
Serokê Herêma Kurdistanê Nêçîrvan Barzanî û Wezîrê Karên Derve yê Brîtanyayê David Lammy li Munîhê civiyan#MSC2025 pic.twitter.com/yUbCpCrOly
— RudawKurdi (@RudawKurdi) February 15, 2025
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse