Hevberdevka HDKyê û Parlamentera DEM Partiyê Meral Daniş Beştaş / Wêne û vîdeo: Rûdaw
Hewlêr (Rûdaw) - Hevberdevka Kongreya Demokratîk a Gelan (HDK) Meral Daniş Beştaşê amaje bi wê yekê kir hinek naxwazin pêvajoya çareseriyê were destpêkirin û got, “Gelo di nava dewletê de rêxistineke din heye?”
Îro li 51 parêzgehên Tirkiye û Bakurê Kurdistan operasyon hatin kirin bi sedan kes bi hinceta “alîkarî, endamtî û propgandaya PKKyê” hatin desteserkirin.
Di nav wan endam û rayêdarên Kongreya Demokratîk a Gelan (HDK) jî hene.
Hevberdevka Kongreya Demokratîk a Gelan (HDK) û Parlamentera DEM Partiyê Meral Daniş Beştaşê ev operasyon û pêvajoya nû ji Nûçegihanê Rûdawê Omer Sonmez re nirxandin.
“Hinek naxwazin pêvajo pêk were”
Meral Daniş Beştaşê diyar kir ku hinek naxwazin pêvajo pêk were û got:
“Bi rastî ez dikarim gelek tiştan li ser van operasyonan bibêjim lê pêşî dixwazim bibêjim ku ev rewşeke ecêb e.
Yanî ev çi ye ku em dijîn? Gel jî vê yekê dipirse. Em her tim dibêjin bila ev hevdîtin derbasî pêvajoyekê bibin.
Em dibêjin bila Tirkiyeyê di nav vê civakê de ji bo gelê Kurd û gelên din aştiyeke mayînde û birûmet were pêkanîn.
Ez ev sê meh in bûme Berdevka HDKyê. Ez jixwe parlamentera DEM Partiyê me û hemû xebatên me li ser aştiyê ne.
Çi tê bîra me? Em dikarin gelek tiştan li ser vê operasyonê bibêjin û şîrove bikin.
Hin kes naxwazin ev pêvajo pêk be, hinek naxwazin ev hevdîtin berdewam bikin û hinek kes naxwazin pirsgirêka gelê Kurd li Tirkiyeyê çareser bibe.
Ev krîpto ye, ev awayekî paralel e. Em nizanin ev çi ye. Me ev berê jî dît.
Hûn dizanin berê jî ji bo Fethullahiyan digotin 'paralel', digotin ew van operasyonan dikin.
Gelo di nav dewletê de rêxistineke din heye? Em vê ji dewletê dipirsin. Em dixwazin bersiva van pirsan were dayîn.
Ji ber ku hemû xebatên HDKyê eşkere û zelal in. Ti xebateke veşartî nayê meşandin.
Em kampanyaya aştiyê dimeşînin, gelo ji ber vê em dibin hedef, em nizanin."
Beştaşê tekez kir di navn wan de kesekî sûcdar nîne û got:
"Em wekî HDK ne girêdayî ti kesî ne, em xebatên civakî dikin. Em dixwazin aştî pêk were.
Tifaqa gelê Kurd gelekî girîng e û divê em vê yekê baş bizanibin."
#VÎDEO - Meral Daniş Beştaş: Gelo di nava dewletê de rêxistineke din heye❓
— RudawKurdi (@RudawKurdi) February 18, 2025
🎙️ Hevberdevka Kongreya Demokratîk a Gelan (HDK) Meral Daniş Beştaş: Hinek naxwazin pêvajo pêk were, hinek naxwazin hevdîtin berdewam bikin
🎙️ Meral Daniş Beştaş: Gelo di nava dewletê de rêxistineke… pic.twitter.com/P8NnB1Y9ib
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse