Kevneşopiyeke cuda ya gundekî Kurdistanê; Misilman û Kirîstiyan bi hev re cejnan pîroz dikin
Hewlêr (Rûdaw) - Li gundê Hirorê yê herêma Berwariya Bala ya Duhokê wek kevneşopiya bav û kalên xwe, şêniyên gund di maleke gund de li hev civiyan û bi hev re taşteya Cejna Qurbanê xwarin. Li gundê Bazê jî wek kevneşopiyekê Kirîstiyan û Misilman bi hev re cejnan pîroz dikin.
Taşteya Cejna Qurbanê ya gundê Hirorê ji qelî, nîskî, kartol û berhemên şîr pêk hatibûn.
Karmend û şêniyê gund Rêber Ruşdî diyar kir ku mazûvaniya bi vî rengî her carê li mala kesekî tê kirin û got, “Vê carê li mala Mam Mekiyê Hirorî bû, ev jî nîşan dide ku gundê Hirorê gundekî yekgirtî ye û aramiya gund çiqasî girîng e.”
Gundî piştî taşteyê, wek bav û kalên xwe stranên gelêrî gotin û bi hev re mal bi mal geriyan, cejna hev pîroz kirin.
Pêşmergeyekî xanenişîn ê ji gund Cafer Elî behsa cejnên dema ciwaniya xwe kir û anî ziman, “Li vir 20 banî hebûn. Me li ser wan banan şahî dikir. Me heta destê sibê kêf û şahî dikir.”
Kirîstiyan û Misilman Cejna Qurbanê li hev pîroz dikin
Li gundekî din ê bi navê Bazê ji gundên din cuda, Misilman û Kirîstiyan bi hev re dijîn, her du pêkhateyên olî yên gund mal bi mal serdana Misilmanan dikin û cejna wan pîroz dikin.
Şêniyê gundê Bazê got, “Li gundê me bawermendên du olan hene; Misilman û Kirîstiyan, ti pirsgirêkên me bi hev re nînin, di cejn û şînan de em diçin serdana hev. Olên me jî cuda ne, ew diçine dêrê û em jî diçine mizgeftê.”
Welatiyê Kirîstiyan ê gund Edîb Yûsif jî anî ziman, “Her cejn em bi birayên xwe yên Misilman re derdikevin û ew jî bi heman awayî di cejnan de mal bi mal serdana me dikin.”
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse