ئۆلاف شۆڵتز، راوێژکاری ئەڵمانیا.
رووداو دیجیتاڵ
راوێژکاری ئەڵمانیا لەبارەی پەنابەرانەوە بە رووداوی گوت، ئەو کەسانەی پاشخانی پەنابەرییان هەیە، دەبێت دەرفەتیان هەبێت لە ئەڵمانیا بەشداری بکەن.
ئەمڕۆ هەینی 21-02-2025 ئۆڵاف شۆڵتز، راوێژکاری ئەڵمانیا بە رووداوی راگەیاند، "دەبێت ئەو هاووڵاتییانەی پاشخانی پەنابەرییان هەیە و یاسای نوێی پەنابەری دەیانگرێتەوە، لە بڕیارداندا بەشداربن."
راوێژکاری ئەڵمانیا لەبارەی دەنگدانەوە باسی لەوە کرد، "دڵنیام ئەنجامی دەنگدان لە ئەنجامی راپرسییەکان جیاواز دەبێت. بەشێکی زۆر لە هاووڵاتییان دوودڵن."
ئەو قسانەی راوێژکارەکەی ئەڵمانیا لەکاتێکدایە، ئەو وڵاتە لە قۆناخێکی گرنگدایە، هەڵبژاردنێکی لەبەردەمە کە شرۆڤەکارانی سیاسی بە هەستیارترین هەڵبژاردنی وڵاتەکە ناوی دەبەن. لەدوای جەنگی جیهانیی دووەم، لە قۆناخی مانەوە لە سیاسەتی لەمێژینە یاخود گۆڕانکاری، نەوەی نوێ دەنگی خۆیان دەبێت.
23ی ئەم مانگە هەڵبژاردنی پەرلەمانی ئەڵمانی بەڕێوەدەچێت. لەم خولەی هەڵبژاردنی بۆندستاگ 4506 بەربژێر هەن و 12یان کوردن.
رووداو: بەڕێز راوێژکاری ئەڵمانیا، بە هەزاران دەنگدەری کورد لە ئەڵمانیا هەن، بۆچی ئەوان دەبێت دەنگ بدەن بە پارتەکەی بەڕێزتان؟
ئۆلاف شۆڵتز: لە روانگەی منەوە، تەواو دڵنیام کە ئێمە لە ئەڵمانیا وڵاتێکین دەبێت یەکگرتوو بین. یەکگرتوویی مانای ئەوەیە کە بۆ نموونە ئەو سێیەکەی دانیشتووانمان کە پاشخانی پەنابەرییان هەیە، چونکە داپیرە یان باوک یان خۆیان لە وڵاتێکی دیکەوە هاتوون، دەرفەتیان هەبێت لەم وڵاتەدا بەشداری بکەن. بۆ نموونە بە یاسای نوێی هاووڵاتیبوون کە دامانناوە. هەموویان سەر بە ئێمەن، لێرە کار دەکەن، باج و بیمەی کۆمەڵایەتی دەدەن. دەبێت بتوانن لە بڕیاردانیشدا بەشدار بن. ئەمەش شتێکە کە ئێمە خەباتمان بۆی کردووە. دڵنیام کە لە سندووقەکانی دەنگداندا بڕیاری تەواو جیاواز دەدرێت لەوەی کە ئێستا لە زۆربەی راپرسییەکاندا پێشبینی دەکرێت. زۆرێک لە هاووڵاتییان دوودڵن. زۆر زیاتر لە هەر هەڵبژاردنێکی پێشووی بوندستاگ. ئەمە هۆکاری هەیە. سەردەمەکە ئاسان نییە، بەڵام لە کۆتاییدا پێویستە بڕیار بۆ ئاراستەیەکی روون بدرێت. ئامۆژگاریی من ئەوەیە کە هەردوو دەنگەکە بدرێت بە SPD.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ