رووداو دیجیتاڵ
وەزیری دەرەوەی فەرەنسا هۆشداریی دا لەوەی، ئەگەر گفتوگۆکان سەبارەت بە بەرنامە ئەتۆمییەکەی ئێران سەرکەوتوو نەبن، رووبەڕووبوونەوەی سەربازی لەگەڵ ئێران "بە نزیکەیی مسۆگەرە."
رۆژی چوارشەممە 02-04-2025 ژان نۆوێل بارۆ، وەزیری دەرەوەی فەرەنسا لە پەرلەمان رایگەیاند، "لە ئەگەری سەرنەکەوتن، رووبەڕووبوونەوەی سەربازی، بە نزیکەیی مسۆگەرە." هەروەها گوتیشی، "ئەوە دەبێتە هۆی ناسەقامگیریی زۆر لە ناوچەکەدا."
کێشەی بەرنامەی ئەتۆمیی ئێران سەریهەڵداوەتەوە و دۆناڵد ترەمپ، سەرۆکی ئەمریکا هەڕەشە لە ئێران دەکات بەوەی، ئەگەر لەسەر بەرنامەی ئەتۆمی رێکنەکەون، ئەوا بۆمببارانی دەکات.
ترەمپ لە هەڤپەیڤینێکدا بە کەناڵی سی بی ئێس نیوزی ئەمریکیی گوت، "ئەگەر ئەوان [لەگەڵمان] رێکنەکەون، بۆمبباران روودەدات. بۆمببارانێک دەبێت کە هەرگیز پێشتر شتی وایان نەبینیوە."
دوێنێ سێشەممە عەباس عێراقچی، وەزیری دەرەوەی ئێران لە نووسینێکدا لە تۆڕی کۆمەڵایەتیی ئێکس رایگەیاند، "رەنگە سەرۆکی ئەمریکا گرنگی بە رێککەوتنە ئەتۆمییەکەی ساڵی 2015 نەدات، بەڵام ئەو رێککەوتنە پابەندبوونێکی سەرەکیی ئێران لەخۆدەگرێت، کە هێشتا وەک خۆی ماوە و تەنانەت ئەمریکاش کە لە دەرەوەی رێککەوتنەکەیە، لێی سوودمەند بووە."
عێراقچیی گوتی، "ئێران دووپاتی دەکاتەوە، هەرگیز و لە هیچ دۆخێکدا هەوڵ نادات بەدوای چەکی ئەتۆمیدا بگەڕێت، دروستی بکات یان بەدەستی بهێنێت."
چوارشەممەی رابردوو، ئێران لە رێگەی عومانەوە، بە فەرمی وەڵامی نامەیەکی ترەمپی دایەوە کە تێیدا سەرۆکی ئەمریکا پێشنیازیکردبوو گفتوگۆ لەسەر رێککەوتنێکی نوێی ئەتۆمی بکەن، ئەگەر نا، بژارەی دیکە لە دژی ئێران بەکاردێنێت.
ترەمپ لە نامەکەیدا دوو مانگ مۆڵەتی بە ئێران دابوو بۆ ئەوەی رێککەوتنێکی نوێ بکات، بە پێچەوانەوە دەکرێت ئەمریکا هێرشی سەربازی بکاتە سەر ئێران.
مەسعود پزیشکیان، سەرۆککۆماری ئێران رۆژی یەکشەممەی رابردوو گوتی، تاران لەم ساتە گفتوگۆی راستەوخۆ لەگەڵ ئەمریکا ناکات، بەڵام جەختیکردەوە کە لە نامەکەیاندا بۆ ترەمپ، بژارەی گفتوگۆی ناڕاستەوخۆیان دوورنەخستووەتەوە.
سەرۆککۆماری ئێران ئاماژەی بەوە کرد، بەرپرسیارێتی بنیاتنانەوەی متمانە لە ئەستۆی ئەمریکادایە، چونکە ئەوە ترەمپ بوو کە ساڵی 2018 بە شێوەیەکی تاکلایەنانە لە رێککەوتنی ئەتۆمی کشایەوە.
لەم چەند رۆژەی رابردوودا، سوپای ئەمریکا ژمارەیەک فڕۆکەی بۆمبهاوێژی راداربەزێن لە جۆری بی 2ی ناردنە بنکەی سەربازیی دیێگۆ گارسیا لە زەریای هیندی، کە بە گوتەی میدیای ئەمریکی، پەیوەندیی بەو مۆڵەتە دوو مانگییەوە هەیە کە ترەمپ بە ئێرانی داوە.
ئەو فڕۆکە جەنگییانە دەتوانن بۆمبی گەورەی حەشارشكێن هەڵگرن کە لە ئەگەری هێرشکردنە سەر بنکە ئەتۆمییە ژێرزەوینییەکانی ئێران، رۆڵی گرنگیان دەبێت.
رۆژی دووشەممە (31ی ئاداری 2025) عەلی خامنەیی، رێبەری کۆماری ئیسلامیی ئێران لە تاران پێشنوێژیی جەژنی رەمەزانی کرد، دواتر گوتارێکی پێشکێش کرد و تێیدا ئاماژەی بە دۆخی ناوچەکە، هێرشەکانی ئیسرائیل بۆ سەر غەززە و لوبنان، سیاسەتی ئەمریکا و وڵاتانی رۆژئاوا بەرامبەر کۆماری ئیسلامیی ئێران و هەڕەشەکانی ئەمدواییەی بەرپرسانی ئەمریکا لە دژی ئێران کرد.
رێبەری باڵای کۆماری ئیسلامیی ئێران ئاماژەی بە گرژییەکانی نێوان ئێران و ئەمریکا کرد و جەختی کردەوە، هەڵوێستیان نەگۆڕاوە، ئەگەر هێرش بکرێتە سەر ئێران، وەڵامێکی تووندیان دەبێت.
عەلی خامنەیی گوتی، "هەموو لایەک بزانن، هەڵویستمان هەر هەمان هەڵویستی جارانە. دوژمنایەتی ئەمریکا و رژێمی زایۆنیش، هەر هەمان شتە کە جاران هەبوو. هەڕەشە دەکەن کە شەڕانگیزی دەکەن، هەڵبەت ئەگەر شەڕانگێزییەک رووبدات، ئێمە زۆر دڵنیا نین، پێمانوایە ئەگەری زۆر نییە کە شەڕانگێزی لە دەرەوە رووبدات، بەڵام ئەگەر شەڕانگێزییەک رووبدات، بە دڵنیاییەوە لە بەرامبەر گورزەکەی ئەوان، گورزێکی تووندمان دەبێت."
لە لایەکی دیکە، ئیسماعیل بەقایی، گوتەبێژی وەزارەتی دەرەوەی ئێران لە تۆڕی کۆمەڵایەتیی ئێکس وەڵامی هەڕەشەکانی دۆناڵد ترەمپ، سەرۆکی ئەمریکای دایەوە کە هەڕەشەی هێرشکردنە سەر ئێرانی کردووە.
ئیسماعیل بەقایی لە پەیامەکەیدا دەڵێت، "هەڕەشەی ئاشکرای بۆردومانکردنی ئێران لەلایەن سەرۆکی وڵاتێکەوە دژایەتییەکی ئاشکرایە لەگەڵ جەوهەری ئاشتی و ئاسایشی نێودەوڵەتی."
گوتەبێژی وەزارەتی دەرەوەی ئێران ئاماژەی بەوەدا، وەڵامی هەر هێرش و هەڕەشەیەک دەدەنەوە و گوتی، "تووندوتیژی، تووندوتیژی دەهێنێت و ئاشتی ئاشتی بەدیدەهێنێت. ئەمریکا دەتوانێت هەڵبژێرێت... لەگەڵ شوێنەوار و دەرئەنجامەکانی."
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ