رووداو هەولێر
یارییەکانی وەرزی نوێی خولی نایابی بالەی عێراق دەستیانپێکرد و یانەی هەولێر بە بەدەستهێنانی دوو سەرکەوتن دڵی هاندەرانی خۆشکرد.
ئەمساڵ یارییەکان بەشێوازی 3 کۆمەڵە بەڕێوەدەچن، یانەی هەولێر لە کۆمەڵەی سێیەمە لەگەڵ یانەکانی ئەهوار، دەغار و حەبانییە.
لە دەستپێكی یارییەکاندا، یانەی هەولێر لە یانەی دەغارەی بردەوە بە ئەنجامی 3 گێمی بێبەرامبەر، لە دووەم یاریشدا هەولێر توانی درێژە بدات بە ئەنجامی باشەکانی و لە یانەی حەبانییەی بردەوە بە ئەنجامی 3 گێم بەرامبەر بە هیچ.
بڕیارە درێس زەردەکان ئێوارەی ئەمڕۆ شەممە کاژێر 16:00 میوانداری یانەی ئەهوار بکەن.
کاکەجوان رەمەزان، راهێنەری یانەی هەولێر، لە لێدوانێکیدا بۆ تۆڕی میدیایی رووداو، رایگەیاند "ئەمساڵ بە تیپێکی بەهێز بەشدارین و دەمانەوێت دڵی هاندەرانی یانەکەمان خۆش بکەین، ئەوەی لە دوو یاریی رابردوودا بینیومە لە یاریزانانم جێگای دڵخۆشیمە".
فیدراسیۆنی بالەی عێراق سەرپەرشتی یارییەکانی خولەکە دەکات، لە هەر کۆمەڵەیەک 2 یانە بۆ قۆناخی کۆتایی سەردەکەون.
وەرزی رابردوو یانەی غازی جنووب نازناوی خولی نایابی عێراقی بردەوە، یانەی پێشمەرگەی سلێمانیش لە پلەی دووەم هات، هەولێر پلەی چوارەمی وەرگرت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ