حەسەن ئۆکتای، سەرۆکی ناوەندی لێکۆڵینەوەی قەوقاز، کە میوانی بوڵتەنی کاژێر 15:00ـی رووداو بوو.
رووداو دیجیتاڵ
سەرۆکی ناوەندی لێکۆڵینەوەی قەوقاز،بە رووداوی راگەیاند، دوای جەژن پێشهاتی خێرا بەڕێوەن و "رەنگە دەم پارتی بەشداری حکومەت بکات و دوو وەزارەتی پێ بدرێت".
ئەمڕۆ دووشەممە 31ـی ئاداری 2025، حەسەن ئۆکتای، سەرۆکی ناوەندی لێکۆڵینەوەی قەوقاز، میوانی بوڵتەنی کاژێر 15:00ـی رووداو بوو، کە هێڤیدار زانا پێشکێشکی دەکات و تایبەتە بە باکووری کوردستان. لە قسەکانیدا ئۆکتای رایگەیاند، ئامادەکاری هەیە بۆ ئەوەی دەم پارتی ببێتە ئەندامێکی نوێی هاوپەیمانی جهموور و لیژنەی هاوبەش لەگەڵ ئاکپارتی و مەهەپە پێکدەهێنن بۆ ئەوەی سەرلەنوێ دەستوور دابڕێژنەوە. پێشبینیشی کرد دەمیرتاش بە لێبووردنی گشتیی ئازاد بکرێت.
حەسەن ئۆکتای هەروەها گوتی، "دوای جەژن هەڵبژاردنی ئەنجوومەنی باڵای دادوەران و داواکارانی گشتیی دەکرێت. دەمەوێ لە رێگەی رووداو ئەم زانیارییە ئاشکرا بکەم. لەم هەڵبژاردنە کورسییەکیش بۆ دەم پارتی جیاکراوەتەوە. لە قۆناخی داهاتوودا رەنگە دەم پارتی هاوشێوەی مەهەپە ئەگەر بەشداری لە حکومەتیش نەکات بەڵام رۆڵی دەبێت، هەنگاوەکان بەم شێوەیە بەڕێوەدەچن."
سەرۆکی ناوەندی لێکۆڵینەوەی قەوقاز راشیگەیاند، پەیوەندییەکان لەگەڵ هەرێمی کوردستان لە باشترین ئاستدایە و بەشداریکردنی دەم پارتیش لە سیستمی حوکمڕانی و لە سووریاش پەیەدە دانوستاندنی لەگەڵ حکومەتی ناوەندیی سووریا کرد، "ئەمەش بۆ کورد بەهارێکی خۆشە".
ئۆکتای بە رووداوی گوت: "ئێستا لە پشت پەردەکان و لە کۆبوونەوە داخراوەکاندا وەرگرتنی وەزارەت لەلایەن دەم پارتییەوە گفتوگۆی لەبارەوە دەکرێت، بەڵام بەهۆی ئەوەی بەڵگەیەکی بەرجەستەکراومان لە دەست نییە و بابەتەکەش هێشتا یەکلایی نەبووەتەوە بۆیە ناتوانین بە راشکاوی ئەم پرسە بخەینەڕوو. بەڵام پێمان سەیر نەبێت ئەگەر دوو وەزارەت بە دەم پارتی بدرێت. دەم پارتی بەردەوام لە دەرەوەی بازنەی سیستمی حوکمڕانی بوو، بەڵام ئەم جارە گوێ لە قسەکانی دەگیرێت، پرس و راوێژی پێ دەکرێ و رای وەردەگیرێت."
باسی لەوەشکرد، ئەم هەنگاوانە زیاتر لە دوای پەیامەکەی ئۆجەلانەوە هاتەکایەوە، کاتێک ئاماژەی بەوەدا کە خەباتی چەکداری کاریگەری نەماوە و دەبێ لەمەودوا لە رێگەی سیاسەتەوە درێژە بە خەبات بدرێت و گوتی، "رەنگە لە قۆناخەکانی داهاتوودا ئامادەکارییەک دەکرێت بۆ ئەوەی دەم پارتی ببێتە بەشێک لە هاوپەیمانی جمهوور و ئەمەش هەنگاوێکی زۆر گرنگە بۆ دەم پارتی".
لەبارەی کاریگەرییەکانی دەستگیرکردنی ئەکرەم ئیمامئۆغڵو و خۆپیشاندانی ئەندامان و لایەنگرانی جەهەپە و بەشێکی خەڵک، حەسەن ئۆکتای پێیوایە دەبێ گرژییەکان کەم بکرێنەوە و گەنجە دەستگیکراوەکان، کە ژمارەیان بۆ هەزار و 100 کەس بەرزبووەوە، دوای جەژن ئازاد بکرێن و پۆلیس لە دژی خۆپیشاندەران تووندوتیژی بەکارنەهێنێت، ئۆکتای دەڵێت، "ئەگەر دۆخەکە بەم شێوەیە بەڕێوەبچێت گرژییەکانی شەقام کاتییە و کۆتایی پێدێت".
حەسەن ئۆکتای هەڵسەنگاندنی بۆ پەیامەکەی ئەمڕۆی دەوڵەت باخچەلی کرد، کە تێیدا تیشکی خستبووە سەر بابەتی هەموارکردنەوەی دەستوور، کە پێویستی بە رەزامەندی 400 پەرلەمانتار هەیە. کۆی دەنگی ئاکپارتی و مەهەپە و ئەندامەکانی دیکەی هاوپەیمانی جمهوور دەگاتە 324 دەنگ. ئەگەر دەم پارتیش بێتە ناو ئەم بەرەیەوە، دەنگەکان دەگاتە 385 دەنگ و بە چڕکردنەوەی هەوڵەکانیش رەنگە بگاتە 400 دەنگ. "ئەوسا پێگەی دەم پارتی لە دەسەڵات سەنگینتر و قسەڕۆیشتوو دەبێت".
لەبارەی ئازادکردنی گیراوە سیاسییەکانی کورد بەگشتیی و سەلاحەدین دەمیرتاش بەتایبەتی، سەرۆکی ناوەندی لێکۆڵینەوەی قەوقاز راشیگەیاند، بۆ پتەوکردنی متمانە، دەوڵەت پەنا بۆ لێبووردنی گشتیی دەبات بۆ ئەوەی دەمیرتاش ئازاد بکرێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ