رووداو دیجیتاڵ
سەرۆکی پارتی بزووتنەوەی نەتەوەیی (مەهەپە) داوا دەکات، پەکەکە بە هەموو پێکهاتەکانییەوە خۆی هەڵوەشێنێتەوە. دەشڵێت "بە هەڵوەشاندنەوەی پەکەکە، رۆژێکی نوێ لە تورکیا هەڵدێت."
دەوڵەت باخچەلی لە گوتارێکیدا کە ئەمڕۆ (دووشەممە، 31ـی ئاداری 2025) لە رۆژنامەی تورکگونی پارتەکەی بڵاوکراوەتەوە، دەڵێت "ئامانجی 'تورکیایەکی بێ تیرۆر' نزیکە لەوەی ببێتە واقیع، یەکێتی نەتەوەیی لە تورکیا بنیات دەنێت و ئاشتی و سەقامگیری خەریکە دەبێتە هەمیشەیی، ژیانێکی سیاسی و کۆمەڵایەتی نوێ لە وڵاتدا پێکدێت".
باخچەلی بانگەوازەکەی عەبدوڵڵا ئۆجەلان، رێبەری زیندانیکراوی پەکەکەی بە "مێژوویی" ناوبرد و گوتی، "دوای بانگەوازەکە، خەڵک بە ئومێدەوە چاوەڕوانە، بەدەست ئێمەیە کە ئەم چاوەڕوانییە بکەینە خۆشی نەک خەم و پەژارە. تورکیایەکی بێ تیرۆر دەبێتە تورکیایەک کە دیموکراسی بەهێزتر بووبێت، لە سەردەمێکدا کە جیهان رێکدەخرێتەوە، ئەگەری ئەوە هەیە ئەم پێشکەوتنە ببێتە دەرفەتێک بۆ تورکیا".
باخچەلی تەنیا بە چەکدانانی پەکەکە رازی نییە و دەڵێت، "سەرەتا دەبێت چەک دابنرێت، پێویستە بەخێرایی کۆنگرەیەک ببەسترێت و بڕیاری هەڵوەشاندنەوەی پەکەکە بە هەموو پێکهاتەکانیەوە جێبەجێ بکرێت. پێویستە یەکێتی نەتەوەییمان لەڕێگەی چاکسازیی هەمەلایەنەوە بەهێز بکرێت، دادپەروەری و یەکسانییش بنچینە بێت".
باخچەلی داوای دەستوورێکی نوێ دەکات و رایگەیاند، "با دەستوورێکی نوێ بنووسین کە هەمووان خۆیان تێدا ببیننەوە".
باخچەلی هەروەها دەڵێ، بۆ بەهێزکردنی ئاشتی کۆمەڵایەتی و کەمکردنەوەی هەڵاواردن، پێویستە لایەنە سیاسییەکان زمانێکی هەمەلایەنە و گشتگیر بەکاربهێنن.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ