هەڵەیەک روویدا! دووبارە هەوڵبدە
گردبوونەوەی مامۆستایانی وانەبێژی شنگال لە دهۆک
رووداو دیجیتاڵ
نوێنەرانی وانەبێژانی خەڵکی شنگال کە لە قوتابخانە حکومییەکانی سەر بە عێراق کاردەکەن، ئەمڕۆ لە دهۆک گردبوونەوە، ئەوان لە ساڵی 2019ـەوە وانەبێژن و دەڵێن ئەگەر دانەمەزرێندرێن، بایکۆت دەکەن.
سەعد حوسێن، یەکێکە لە وانەبێژەکان و بە رووداوی گوت "ئەمڕۆ رامانگەیاند و دەواممان بایکۆت کرد. ئیدی دەوام ناکەین هەتاوەکو شتێکی راستەقینەمان بۆ نەکرێت. ئێمە هیچ بەڵێنێک قبوڵ ناکەین، چونکە لەوە رەتمانداوە، لە 2019ـەوە تاوەکو ئێستا هەر بەڵێن و بەڵێن دەدرێن.''
ژمارەی وانەبێژانی شنگال لە پارێزگای دهۆک، 500 وانەبێژە هەروەها نزیکەی 600 وانەبێژ دانیشتووی شنگالن و چاوەڕێی دامەزراندنن.
وانەبێژێکی دیکە بەناوی عەبیر جەلال دەڵێ "ئێمە وانەبێژی بێبەرامبەرین لە 2019ـەوە تاوەکو ئێستا، ئەوە بووە ساڵی 2024 و مافی خۆمان وەرنەگرتووە، کەس یارمەتیمان نادات، دێینە ئێرەش (نوێنەرایەتیی پەروەردەی نەینەوا لە دهۆک) کەس لەگەڵمان ناوەستێت.''
نوێنەرایەتیی پەروەردەی نەینەوا لە پارێزگای دهۆک بە رووداوی گوت، ئەوان نووسراوی دامەزراندنی وانەبێژانیان بەرزکردووەتەوە و چاوەڕێی وەڵامن.
لەنێو کەمپی ئاوارەکان، خوێندنی کوردی و عەرەبی هەیە، قوتابخانەکانی خوێندنی عەرەبی سەر بە حکومەتی عێراقن، بەڕێژەی جیاواز مامۆستای وانەبێژیان هەن، هەندێک لەو قوتابخانانە زیاتر لە نیوەی مامۆستاکانیان وانەبێژن و ئەگەر دەوام نەکەن، کاریگەریی لەسەر پرۆسەی خوێندن دەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ