هەڵەیەک روویدا! دووبارە هەوڵبدە
رووداو دیجیتاڵ
سەرۆکوەزیرانى عێراق لە دادگەى باڵاى فیدراڵى، سکاڵا لەدژى دوو یاسای تایبەت بە سەرۆکایەتیى کۆمار و دەسەڵاتەکانى تۆمار دەکات.
دادگەى باڵاى فیدڕاڵى عێراق 9ى نیسانى 2025ى دیاریکردووە وەک یەکەم دانیشتنى تایبەت بە تاوتوێکردنى ئەو سکاڵایە.
سکاڵاکە لە دژى هەریەک لە سەرۆکى پەرلەمان و سەرۆککۆمارە، بەگوێرەى خشتەى سکاڵانامەکە داوا کراوە هەردوو یاساى دیوانى سەرۆکایەتى کۆمارى ژمارە چوارى ساڵى 1984 و پەیڕەوى ناوخۆى سەرۆکایەتى کۆمارى ژمارە 1ی ساڵى 2023 بە نادەستوورى بناسێنێت و هەڵیانبوەشێنێتەوە.
یەکێک لە داواکارییەکانى دیکەى ئەو سکاڵایە ئەوەیە، نادەستووریبوونى یاسای دیوانى سەرۆکایەتى ژمارە 4ى 1984 لە دواى کارابوونى دەستوورى هەمیشەیى عێراق لە 2005ـەوە هەژمار بکرێت.
یاسای ژمارە 4ى دیوانى سەرۆکایەتى لە سەردەمى دەسەڵاتى حیزبى بەعس دەرکراوە و تاوەکو ئێستا کارایە و هەڵنەوەشێنراوەتەوە. هەرچى یاساى پەیڕەوى ناوخۆى سەرۆکایەتیى کۆمارە لەم خولەى پەرلەمانى عێراق دەنگى لەسەر درا و لە 29ى ئایارى 2023وە کەوتە بوارى جێبەجێکردنەوە، کە تایبەتە بە رێکخستنى پەیکەرى کارگێڕى و دەسەڵاتەکانى سەرۆکایەتى کۆمار.
بەگوێرەى زانیارییەکانى تۆڕى میدیایی رووداو، پێشکێشکردنى ئەو سکاڵایە پەیوەندارە بە ناڕوونى لە دەسەڵاتەکانى سەرۆکوەزیران و سەرۆکایەتى کۆمار، بەتایبەت لەوەى پەیوەندارن بە پێشکێشکردنى پڕۆژەیاساکان بۆ پەرلەمان.
سەرچاوەیەکى ئاگادار لەو دۆسیەیە کە لەبەر هەستیارى پرسەکە نەیویست ناوى بڵاوبکرێتەوە بە رووداوى گوت، "پێشتر محەممەد شیاع سوودانى سەرۆکوەزیران ئەو سکاڵایەى پێشکێشی دادگەى باڵاى فیدڕاڵى کردبوو، بەڵام کشاندیەوە، ئێستا جارێکى دیکە پێشکێشى کردووەتەوە".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ