رۆژهەڵاتی نێوەڕاست
ژمارەیەک ئۆتۆمبێل لەبەردەم باڵەخانەکەی بەیرووت کە 1-4-2025 کرایە ئامانجی ئیسرائیل، زیانیان بەرکەوتووە، وێنە: AFP
prev
next
رووداو دیجیتاڵ
سوپای ئیسرائیل جارێکی دیکە هێرشی کردە سەر چەند گەڕەکێکی باشووری بەیرووتی پایتەختی لوبنان، بەو هۆیەوە سێ کەس کوژران، سوپاکە دەڵێ ئامانجی سەرکردەکانی حیزبوڵڵا بووە.
بەرەبەیانیی ئەمڕۆ (سێشەممە، 1ـی نیسانی 2025) سوپای ئیسرائیل رایگەیاند؛ چەند باڵەخانەیەکی لە باشووری بەیرووت کردووەتە ئامانج، کە ئەندامانی حیزبوڵڵایان تێدا بووە. بەگوێرەی سوپای ئیسرائیل ئەو چەکدارانە هاوکاریی چەکدارانی حەماسی فەلەستینیان کردووە کە بە رۆکێت لە کەرتی غەززەوە، ناوچە سنوورییەکانی باشووری ئیسرائیل بۆردوومان بکەن.
ئەو هێرشانەی بەرەبەیانیی ئەمڕۆ بەبێ هیچ ئاگادارکردنەوەیەک بوون. لەدوای زیاتر لە پێنج مانگ لە ئاگربەست لەنێوان ئیسرائیل و لوبنان، چەند رۆژێک لەمەوبەر ئیسرائیل بۆردوومانی باشووری لوبنانی کرد. پێش هێرشەکە ئیسرائیل دانیشتووانی ناوچەکەی ئاگادار کردبووەوە.
دەستپێکردنەوەی هێرشەکانی ئیسرائیل لەدوای ئەوە هات؛ دووجار بە رۆکێت لە باشووری لوبنانەوە خاکی ئیسرائیل کرابووە ئامانج، بەڵام حیزبوڵڵا رەتیکردبووەوە ئەوان ئەو هێرشانەیان کردبێت.
بەگوێرەی تەندروستیی لوبنان، بەهۆی هێرشەکەوە 7 کەس بریندار بوون.
یەکێک لە ئامانجەکانی هێرشەکەی بەرەبەیانیی ئەمڕۆی سوپای ئیسرائیل؛ باڵەخانەیەکی سێ نهۆمی بووە لە باشووری بەیرووت، کە زیانێکی زۆری بەرکەوتووە و زیانی بە چەند باڵەخانەیەکی دیکەش گەیاندووە.
یەکێک لە دانیشتووانی گەڕەکەکە، بە ئاژانسی رۆیتەرزی راگەیاندووە؛ خەڵک سەرقاڵی جەژنی رەمەزان بوون، کاتێک درۆنەکانی ئیسرائیل باڵەخانەکەیان کردووەتە ئامانج.
رۆژی شەممە، 29ـی ئادار، شێخ نەعیم قاسم، ئەمینداری حیزبوڵڵای لوبنانی هۆشداریی دا؛ ئەگەر ئیسرائیل لە هێرشەکانی بۆ سەر لوبنان بەردەوام بێت و ئەگەر حکومەتی لوبنانیش هیچ هەڵوێستێکی نەبوو بۆ راگرتنی ئەو هێرشانە، گرووپەکەشیان ناچار دەبێت بژارەی دیکە بگرنەبەر.
بەسەرپەرشتیی ئەمریکا، مانگی تشرینی دووەمی رابردوو، ئیسرائیل و حیزبوڵڵا ئاگربەستیان راگەیاند و کۆتاییان بە شەڕی 14 مانگەی نێوانیان هێنا، بەگوێرەی مەرجەکانی ئاگربەست، بڕیاربوو سوپای ئیسرائیل لە مانگی کانوونی دووەمی رابردوو بە تەواوەتی لە ناوچەکانی باشووری لوبنان بکشێتەوە تاوەکو باشووری رووباری لیتانی کە نزیکەی 30 کیلۆمەتر لە سنوورەکانی باکووری ئیسرائیلەوە دوورە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ