رووداو دیجیتاڵ
قوباد تاڵەبانی، جێگری سەرۆکوەزیرانی هەرێمی کوردستان پێشوازی لە بانگەوازی عەبدوڵا ئۆجەلان، رێبەری زیندانیکراوی پەکەکە دەکات و دەڵێت، "ئەرکی هەموو لایەکمانە پێشوازی لە پەیامەکەی بەڕێز ئۆجەلان بکەین و لە هەر چەشنە هاوکاری و پشتیوانییەک بۆ سەرخستنی پرۆسەکە درێخی نەکەین."
ئەمڕۆ پێنجشەممە، 27-2-2025، شاندی دەم پارتی لە ئیستەنبووڵ پەیامی ئاشتیی ئۆجەلانیان راگەیاند. ئەحمەد تورک پەیامەکەی خوێندەوە. ئەوەش دوای ئەوەی شاندە حەوت کەسییەکە ئەمڕۆ سەردانی ئیمراڵییان کرد.
لە پەیامەکەیدا، ئۆجەلان رایدەگەیێنێت، "لە کەشوهەوای ئێستادا، کە بە بانگەوازی بەڕێز دەوڵەت باخچەلی دروست بووە و ئەو ئیرادەیەی کە بەڕێز سەرۆک کۆمار نیشانیداوە و هەڵوێستە ئەرێنییەکانی پارتە سیاسییەکانی دیکە بەرامبەر بەم بانگەوازە، من بانگەواز بۆ چەکدانان دەکەم و بەرپرسیارێتی مێژوویی ئەم بانگەوازە دەگرمە ئەستۆ".
جیگری سەرۆکوەزیرانی هەرێمی کوردستان لەبارەی پەیامەکەی ئۆجەلانەوە گوتی، "ئەمڕۆ بەڕێز عەبدوڵڵا ئۆجەلان جارێکی دیکە دەرگای بەڕووی ئاشتی و چارەسەری ئاشتییانە و دیموکراسییەکانی پرسی کورد لە تورکیا دا کردەوە و هاوکات دەستپێکی قۆناخێکی نوێی تێکۆشانی سیاسی بۆ کورد لە تورکیا راگەیاند. هیوادارین و گەشبینین ئەمجارەیان پرۆسەکە بە ئەنجامێکی دڵخواز بۆ هەردوو گەلی کورد و تورک کۆتایی بێت و پێکەوە بناخەی پێکەوەژیانێکی راستەقینە بونیادبنێن."
قوباد تاڵەبانی: کورد هەمیشە گەلێکی ئاشتیخواز بووە و بزووتنەوە کوردییەکان وەک دوا رێگەچارە و بە ناچاری، بۆ پاراستنی مان و داکۆکی لە مافە بنەڕەتییەکان پەنایان بردوەتەبەر بە چەک.
— Rudaw (@Rudawkurdish) February 27, 2025
زانیاریی زیاتر:https://t.co/LrrNJ5bKhF pic.twitter.com/DOL8om0xkL
قوباد تاڵەبانی گوتیشی، کورد هەمیشە گەلێکی ئاشتیخواز بووە و بزووتنەوە کوردییەکان وەک دوا رێگەچارە و بە ناچاری، بۆ پاراستنی مان و داکۆکی لە مافە بنەڕەتییەکانیان پەنایان بردووەتەبەر بە چەک.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ