هەڵەیەک روویدا! دووبارە هەوڵبدە
رووداو دیجیتاڵ
راوێژکاری ئەڵمانیا پێشوازی لە بانگەوازەکەی عەبدوڵڵا ئۆجەلان، رێبەری زیندانیکراوی پەکەکە دەکات کە تێیدا داوای چەک دانان لە پەکەکە دەکات.
رۆژی پێنجشەممە، 27ـی شوباتی 2025، شتێفان زایبەرت، گوتەبێژی حکومەتی ئەڵمانیا لەسەر زاری راوێژکاری ئەڵمانیا گوتی: "راوێژکاری ئەڵمانیا ئۆلاف شۆڵتز پێشوازی لە بانگەوازەکەی ئەمڕۆی عەبدوڵڵا ئۆجەلان، سەرۆکی پەکەکە دەکات بۆ دانانی چەک و هەڵوەشاندنەوەی پەکەکە."
گوتەبێژەکەی حکومەتی ئەڵمانیا دەشڵێت: "پەکەکە رێکخراوێکی تیرۆریستیی قەدەخەکراوە لە ئەڵمانیا و شەڕەکەی قوربانییەکی زۆری لێکەوتووەتەوە. داواکارییەکەی ئۆجەلان ئێستا لە کۆتاییدا دەرفەتێک دەڕەخسێنێت بۆ زاڵبوون بەسەر ئەم خەباتە تووندوتیژییە و گەیشتن بە پەرەسەندنێکی ئاشتیخوازانەی هەمیشەیی لە پرسی کورد دا."
ئەمڕۆ پێنجشەممە، 27-2-2025، شاندی دەم پارتی لە ئیستەنبووڵ پەیامی ئاشتیی ئۆجەلانیان راگەیاند. ئەحمەد تورک پەیامەکەی خوێندەوە. ئەوەش دوای ئەوەی شاندە حەوت کەسییەکە ئەمڕۆ سەردانی ئیمراڵییان کرد.
لە پەیامەکەیدا، ئۆجەلان رایدەگەیێنێت، "لە کەشوهەوای ئێستادا، کە بە بانگەوازی بەڕێز دەوڵەت باخچەلی دروست بووە و ئەو ئیرادەیەی کە بەڕێز سەرۆک کۆمار نیشانیداوە و هەڵوێستە ئەرێنییەکانی پارتە سیاسییەکانی دیکە بەرامبەر بەم بانگەوازە، من بانگەواز بۆ چەکدانان دەکەم و بەرپرسیارێتی مێژوویی ئەم بانگەوازە دەگرمە ئەستۆ".
پێشتر، وەزارەتی دەرەوەی ئەڵمانیا لەو بارەیەوە رایگەیاند، بانگەوازەکە "دەرفەتێکی مێژووییە" بۆ کۆتاییهێنان بە شەڕی چەندین دەیەی نێوان تورکیا و پارتی کرێکارانی کوردستان.
گوتەبێژێکی وەزارەتەکە لە راگەیێندراوێکدا دەڵێت: "کۆتاییهێنان بە تووندوتیژی هەنگاوێکی سەرەتایی گرنگە، بەڵام پێویست بە هەنگاوی زیاتر دەکات. لە نێویاندا و لە سەرووی هەموویانەوە، رێزگرتن و دەستەبەرکردنی مافە کولتووری و دیموکراسییەکانی کورد لە تورکیا".
گوتەبێژی وەزارەتی دەرەوەی ئەڵمانیا رایدەگەیێنێت: "وەک حکومەتی فیدراڵی، ئامادەین بۆ پشتیوانیکردنی پڕۆسەیەکی لەم شێوەیە، ئەوەی پێمان بکرێت بیکەین".
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ