کێشەی خێزانە کوردەکان لە سەرژمێری
رووداو دیجیتاڵ
خێزانێک لە 19-11-2024 لە کەلارەوە چوونەتە خانەقین لە ماڵی خزم و کەسوکاریان ماونەتەوە بەڵام بژمێرەکانی سەرژمێری چوونەتە لایان و گوتوویانە کە تۆمار نەکرێن. رووداو بەدواداچوونی کرد و کێشەکەیان چارەسەرکرا و سەرجەمیان تۆمار کران
هونەر حەمید، پەیامنێری رووداو لەدوای ئامادەکردنی راپۆرتەکە پەیوەندی کرد بە مەیسوون نووری، سەرپەرشتیاری بەشی سەرژمێری خانەقین و کێشەی ئەو خێزانە کوردی گەیاند، ئەو بەرپرسە بەڵێنی دا کە کێشەکەیان چارەسەر بکات و پاش چەند کاژێرێک، تیمەکان چوونە لای ئەندامانی خێزانەکە و ناویان تۆمار کران.
ئەحمەد عەبدولکەریم وەستای بۆیاخە لە کەلار، لەگەڵ ماڵی باوکی و براکانی رۆژێک پێش قەدەخەی هاتووچۆ دەچنە خانەقین، خۆی و هاوژینەکەی و دوو منداڵەکەی ناونووس نەکراون.
ئەحمەد عبدولکەریم بە رووداوی گوت: "لە کەلارەوە دوێنی هاتم، بەڵام دەڵێت، ناوت نانووسین نازانم بۆ. گرفتەکەمان تەنیا ئەوەیە تۆمار ناکرێین."
رووداو هەر باسی کێشە ناکات بەڵکو چارەسەریشی دەکات؛ چەند خێزانێک لە کەلارەوە بۆ بەشداری لە سەرژمێری چووبوونە خانەقین، بەڵام بژمێرەکان ناویان تۆمار نەکردبوون، هونەر حەمید دەنگی گەیاندن و سەرجەم ئەندامانی ئەو خێزانانە تۆمار کرانhttps://t.co/D5qJMW2ulU pic.twitter.com/GBNEUH9dWC
— Rudaw (@Rudawkurdish) November 20, 2024
هۆکاری تۆمارنەکردنی بەشێکی بەرچاوی ئاوارە گەڕاوەکانی خانەقین جیاواز و فرەچەشن بوون، هۆکارەکان بە دیاریکراوی کوردانی رەسەنی ئەو ناوچانەیان کردە ئامانج.
سۆزان مەنسوور، ئەندامی پەرلەمانی عێراق لە فراکسیۆنی یەکێتی لەبارەی ئەو کێشانەوە بە رووداوی گوت: "لە تەپەچەرموو کەسیان تۆمار نەکرد، گوتیان مادام عەرەبەکان تۆمار ناکرێن بۆیان نییە کوردەکانیش تۆمار بکرێن، بەڵام ناوچەکە ماڵ و خانوو و شتی لێیە، لە ناوچەی کوڵەجۆ 800 خێزانن بەڵام لە بەیانییەوە 100 خێزان تۆمار کراون. ئینتەرنێت لەوێ زۆر خاوە و تەنیا چوار تابلێتیشی لێیە."
خانەقین دەکەوێتە سنووری مادەی 140 ـی دەستوور، ئەو مادەی دەبوو نزیک بە 18 ساڵ لەمەوبەر پرسی خاک و خەڵکی ئەو ناوچانەی یەکلایی بکردایەتەوە، گەڕانەوەی ئاوارە کوردەکانی ئەو ناوچانە لە رۆژانی سەرژمێریی گشتی بۆ سەلماندنی ئەو مافە بوو دەستوور بە کوردی داوە و عێراق بە بیانووی جیاواز خۆی لێدەدزێتەوە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ