لە شرنەخ شەڕ لەنێوان پەکەکە و جەندرمە روویدا و 'شەش کەس کوژران'

 

 

وەزارەتی ناوخۆی تورکیا رۆژی سێشەممە 16-05-2023 بڵاویکردەوە، شەوی رابردوو لەمیانی بەڕێوەچوونی ئۆپەراسیۆنێکی تایبەتی هێزەکانی فەرماندەیی جەندرمەدا رووبەڕووبوونەوە لەنێوان سەربازانی جەندرمە و گەریلاکانی پەکەکە لە بەرزاییەکانی بەستەلەر دەرەلەر لە شرنەخ روویدا.

 

وەکو وەزارەتی ناوخۆی تورکیا دەڵێت، رووبەڕووبوونەوەکە تاوەکو بەرەبەیانی ئەمڕۆ سێشەممە 16ی ئایاری 2023 بەردەوام بووە و لەو شەڕەدا سێ گەریلا گیانیان لەدەستداوە و دوو سەربازیش کوژراون، سەربازێک و گوندپارێزێکیش بریندار بوون.

 

هەر ئەمڕۆ پارێزگای شرنەخ لە راگەیێندراوێکدا بڵاویکردەوە، سەربازە بریندارەکەی جەندرمە بەهۆی سەختیی برینەکەیەوە لە نەخۆشخانەی گشتیی شرنەخ گیانی لەدەستدا و گوندپارێزە بریندارەکەش دۆخی ناجێگیرە و لە چاودێریی چڕی نەخۆشخانەکەدا چارەسەر وەردەگرێت؛ ئاماژەی بەوەش کردووە، ئۆپەراسیۆنەکە تاوەکو ئێستا لە ناوچەکەدا بەردەوامە.

 

ناوەندی راگەیاندن و چاپەمەنیی پارتی کرێکارانی کوردستان، هەواڵی گیانلەدەستدانی گەریلاکانی بڵاونەکردووەتەوە، بەڵام کوژرانی سێ سەربازەکەی سەر بە فەرماندەیی هێزەکانی جەندرمەی راگەیاندووە.