کوردستان
وێنەیەکی ئەرشیڤیی دوایین خاڵی سەربازیی پاسەوانی سنووری عێراق لە دەڤەری مزووری باڵا، وێنە: هەژار جەوهەر - رووداو
رووداو دیجیتاڵ
گوتەبێژی ناوچەی یەکی هێزەکانی پاسەوانی سنووری عێراق لەبارەی بڵاوبوونەوەی ناوی ئەو کەسانەی فۆرمیان بۆ دامەزراندن لە هێزەکانی پاسەوانی سنوور پڕکردووەتەوە، رایگەیاند، هیچ شتێکی نوێ نییە و ئەوەی بڵاودەکرێتەوە نافەرمییە.
عەقید کاروان خۆشناو، گوتەبێژی ناوچەی یەکی ھێزەکانی پاسەوانی سنووری عێراق لەبارەی دوایین پێشهاتەکانی دامەزراندنی پاسەوانانی سنوور لە هەرێمی کوردستان (چوارشەممە، 12-7-2023) بە تۆڕی میدیایی رووداوی راگەیاند "ماوەیەکە ژمارەیەک پەیج و لایەن و کەس، لیست بڵاودەکەنەوە گوایە ناوی ئەوانەیە، کە لە هێزەکانی پاسەوانی سنوور دامەزرێندراون". بەڵام رەتیکردەوە ئەو لیستانە راست بن و گوتی: "ئەو لیستانەی بڵاودەکرێنەوە ناڕاستن و نافەرمین و هیچ شتێکی فەرمی نییە و بڵاونەکراوەتەوە، هەرکاتێک لە سەرچاوە فەرمییەکانەوە لیستەکانمان پێگەیشت، بڵاویان دەکەینەوە".
عەقید کاروان خۆشناو، گوتی "هەر کاتێک پرۆسەکە تەواو بوو، ناوەکان لە سێ پەیجی فەرمی هەن بڵاودەکرێنەوە، پەیجەکانی وەزارەتی ناوخۆی عێراق، پاسەوانی سنوور و بەڕێوەبەرایەتی بەڕێوەبردنی خۆبەخش، جگە لەو سێ شوێنە، ئەو شوێنانەی دیکە نافەرمین".
دوای ئەوەی وەزارەتی ناوخۆی عێراق دامەزراندنی پاسەوانانی سنووری لە هەرێمی کوردستان رایگەیاند، رۆژی دووشەممە 16-01-2023 لینکی پڕکردنەوەی فۆرمی دامەزراندن لە پاسەوانی سنوور کاراکرا و، رۆژی 18-01-2023 کاژێر 12:00ـی شەو راگیرا.
دامەزراندنی ئەو پاسەوانانە تایبەتە بۆ ناوچەی یەکی پاسەوانی سنوور کە پارێزگاکانی هەولێر، دهۆک و سلێمانی بە درێژایی نزیکەی هەزار و 30 کیلۆمەتر دەگرێتەوە.
مەرجەکانی دامەزراندنەکە بریتین لە: کەسەکە دەبێت تەمەنی لەنێوان 17 ساڵ بۆ 35 ساڵ بێت، لە دایک و باوکێکی عێراقی بێت، فۆرمەکە بە زمانی عەرەبی پڕبکاتەوە و تەنیا پێویستە بڕوانامەی سەرەتایی و دواناوەندیی هەبێت.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ