پاسەوانی سنوور: 12 قاچاخچیمان دەستگیرکرد

 

عەقید کاروان خۆشناو، گوتەبێژی ناوچەی یەکی پاسەوانی سنووری عێراق ئەمڕۆ (شەممە، 26-08-2023) بە تۆڕی میدیایی رووداوی راگەیاند "لەژێر فەرمانی فەرماندەی هێزە سنوورییەکان و بەسەرپەرشتیی فەرماندەی هێزی سنووری یەک، مەفرەزەیەکی سەر بە فەوجی 2ـی لیوای 21، توانیان 12 کەسی ئێرانی دەستگیر بکەن لەگەڵ هەندێک کەرەستە، کە دەیانویست بەشێوەی قاچاخ هەناردەی ئێرانی بکەن."

 

بەگوتەی کاروان خۆشناو، "35 کارتۆن جگەرە؛ 28 کارتۆن تامی نێرگەلە و پێنج کارتۆن ئامێری سەتەلایت دەستیان بەسەردا گیراوە کە ئەوان دەیانویست لە عێراقەوە بە قاچاخ بیانبەنە ئێران." 

 

گوتەبێژی ناوچەی یەکی پاسەوانی سنوور دەڵێت، "ئەو 12 کەسە بەپێی یاسا، بە نووسراو رادەستی لایەنی پەیوەندیدار لە حکومەتی هەرێمی کوردستان دەکرێن و ئەوەش رۆژانە هەیە و ئەو کەسانەی دەیانەوێت بە قاچاخ سنوورەکان ببەزێن دەستگیردەکرێن."

 

بەپێی ئەو وێنانەی لەلایەن گوتەبێژی ناوچەی یەکی پاسەوانی سنووری عێراق بڵاوکراونەتەوە، کە کەسە دەستگیرکراوەکان تێیاندا دەردەکەون، بەشێکی ئەو کەسانە شەرواڵ و جلوبەرگی کوردییان لەبەرە و کۆڵبەرن.