رووداو دیجیتاڵ
سەرۆکی هەرێمی کوردستان پرسە و سەرەخۆشیی خۆی ئاراستەی د. بەرهەم ساڵح دەکات بۆ کۆچی دوایی رۆژنامەڤان بەڵێن ساڵحی برای.
ئێوارەی رۆژی یەکشەممە، 30ـی ئاداری 2025، نێچیرڤان بارزانی لە پەیامێکی سەرەخۆشیدا رایگەیاند: "پرسه و سه‌ره‌خۆشيى قووڵم ئاراسته‌ى براى به‌ڕێزم د. به‌رهه‌م ساڵح سه‌رۆككۆمارى پێشووى عێراقى فيدراڵ ده‌كه‌م بۆ كۆچى دواييى خوالێخۆشبوو رۆژنامه‌نووس به‌ڵێن ساڵح ـ ى برايان."
سەرۆکی هەرێمی کوردستان دەڵێت: "له دڵه‌وه هاوسۆز و هاوخه‌مى به‌ڕێزيان و خانه‌واده و كه‌سوكاريانم، له خواى مه‌زن داواكارم گيانى خوالێخۆشبوو به به‌زه‌يى و ميهره‌بانيى خۆى شاد بكات و ئارامى و دڵنه‌وايى به هه‌موو لايه‌ک ببه‌خشێت."
هاوکات، ئاماژە بەوە دەکات: "خوالێخۆشبوو به‌ڵێن ساڵح وه‌ک رۆژنامه‌نووسێكى ديارى كورد و رۆڵه‌ى خانه‌واده‌يه‌كى تێكۆشه‌رى كوردستان، هه‌ميشه خزمه‌تى به دۆزى ره‌واى گه‌لى كوردستان كردووه و جێى خۆى كردووه‌ته‌وه. گيانى شاد و يادى به خێر بێت."
بەگوێرەی زانیارییەکانی تۆڕی میدیایی رووداو، نزیک کاژێر 07:00ـی ئێوارەی ئەمڕۆ، بەڵێن ساڵح، پێشکێشکار لە بەشی کوردیی دەنگی ئەمریکا لە ویلایەتی ڤێرجینیای وڵاتەکە کۆچی دواییکردووە. بەپێی زانیارییە سەرەتاییەکانیش، هۆکاری گیانلەدەستدانەکەی جەڵتەی دڵ بووە.
بەڵێن ساڵح جیا لەوەی میدیاکارێکی ناسراو بوو، برای بەرهەم ساڵح، سەرۆککۆماری پێشووی عێراقە.
بەڵێن ئەحمەد ساڵح، ساڵی 1961 لە شاری هەڵەبجە لە دایکبووە. هەرچەند یەکێکن لە بنەماڵە ناسراوەکانی شاری سلێمانی، بەڵام خۆی گێڕاویەتییەوە، کە هۆکاری لەدایکبوونی لە هەڵەبجە ئەوە بووە، باوکی لەو سەردەمەدا لە هەڵەبجە فەرمانبەر بووە.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ