مامۆستا ئازاد هورمزیار، بەرپرسی لقی کەرکووکی یەکێتیی زانایانی ئایینی ئیسلامی کوردستان
رووداو دیجیتاڵ
بەرپرسی لقی کەرکووکی یەکێتیی زانایانی ئایینی ئیسلامی کوردستان دەڵێت، جیاوازیی یەکەم رۆژی جەژن لەنێوان کەرکووک و هەرێمی کوردستان هیچ گرفتێکی شەرعی نییە؛ گوتیشی، ''بۆ دیاریکردنی یەکەم رۆژی جەژن لە هەرێمی کوردستان، مانگ نەبینراوە.''
ئەمڕۆ (دووشەممە، 31-03-2025) لە عێراق و کەرکووک بە فەرمی نوێژی جەژن لە سەرجەم مزگەوتەکان کرا و یەکەم رۆژی جەژنی رەمەزان بوو. مامۆستا ئازاد هورمزیار، بەرپرسی لقی کەرکووکی یەکێتیی زانایانی ئایینی ئیسلامی کوردستان بە تۆڕی میدیایی رووداوی رایگەیاند، ''دوێنێ لە گەڕەکی فەیلەق، مزگەوتێک بە ئیجتیهادی گوتارخوێنەکەی نوێژی جەژنی کردبوو، ئەگەرنا سەرجەم کەرکووک و دەوروبەری، لەسەر ئەو فەتوایە بوون کە ئەمڕۆ یەکەم رۆژی جەژنی رەمەزانە.''
ئەنجوومەنی باڵای فەتوا لە هەرێمی کوردستان دوێنێ (یەکشەممە، 30-3-2025)ـی وەکو یەکەم رۆژی جەژن دیاریکردبوو.
مامۆستا ئازاد هورمزیار لەبارەی ئەو جیاوازییە بۆ دیاریکردنی یەکەم رۆژی جەژن گوتی، ''بە هیچ جۆرێک ئیحراجی لە راگەیاندنی یەکەم رۆژی جەژندا نەبووە، ئەو دەڤەرە سەر بە چ لیژنەیەکی فەتوا و ئیدارەیەکە، دەبێت لەسەر فەتوای ئەوان بیکاتە جەژن.''
بەرپرسی لقی کەرکووکی یەکێتی زانایانی ئایینی ئیسلام ئاماژەی بەوە کرد، ''هەرێمی کوردستان کیانێکە تاوەکو رادەیەکی زۆر لە بڕیارەکانی و فەتوادا سەربەخۆیە، کەرکووکیش بە دەوروبەرییەوە ئێستا سەر بە بەغدایە، واتا ئەوەی فەتوا بۆ ئەم بابەتانە دەدات، وەقفی سوننەی بەغدا و کۆمەڵەی فیقهی عێراقییە.''
مامۆستا ئازاد هورمزیار جەختی لەوە کردەوە، ئەو فەتوایەی بۆ دیاریکردنی یەکەم رۆژی رەمەزان لە کەرکووک دراوە، ''لەڕووی شەرعییەوە 100٪ تەواوە و هەموو شاری کەرکووکیش پابەندن بە بڕیارەکە و هیچ فەتوایەکمان دژی نییە.''
بەپێی فەرموودەیەکی پێغەمبەری ئیسلام (د.خ.) هەر کاتێک مانگ بینرا، دەکرێتە جەژن، ئەگەریش مانگ نەبینرا، ئەوە رەمەزانە.
بەرپرسی لقی کەرکووکی یەکێتیی زانایانی ئایینی ئیسلامی کوردستان دەڵێت، ''لە هەرێمی کوردستانیش مانگیان نەبینی. سەیرم دێت کە لەسەر بابەتێکی لەوشێوەیە هەموو جیهان دەچێتە سەر مەزهەبی شافیعی، بەڵام تەنیا کورد بە رای ئەو مەزهەبە ناجووڵێتەوە کە بەوە ناسراون سوننەی شافعین.''
لە کاتی رووماڵی یەکەم رۆژی جەژنی رەمەزان لە هەرێمی کوردستان، چەند کەسێک لە کەرکووک لێدوانیان بۆ رووداو دا و گوتیان بە چاوی خۆیان مانگیان بینیوە، ئەو مامۆستا ئایینییە باسی لەوە کرد، ''ئەو بابەتە نەگونجاوە، چونکە مانگی یەکشەوە بە جۆرێک نییە بە چاو ببینرێت، تەنانەت بە ئامێری پێشکەوتووش بینینی زۆر ئەستەمە.''
سوننەکانی عێراق لەسەر دیاریکردنی یەکەم رۆژی جەژنی رەمەزان کۆک نەبوون. دیوانی وەقفی سوننە کە دامەزراوەیەکی فەرمیی سەر بە دەوڵەتە و نوێنەرایەتیی کاروباری ئایینی سوننەکانی عێراق دەکات، رۆژی شەممە لە راگەیێندراوێکدا رایگەیاند، "سبەی یەکشەممە تەواوکەری مانگی رەمەزان و دووشەممە یەکەم رۆژی جەژنی رەمەزان دەبێت."
ئەوە لەکاتێکدا بوو دەستەی فەتوای عێراق، کە ئەویش دامەزراوەیەکی سوننەیە بەڵام نافەرمییە، رایگەیاند، "ئەمڕۆ (شەممە) مانگی شەوال بینراوە و سبەی یەکەم رۆژی جەژنی رەمەزانە."
لیژنەی بینینی مانگ لە هەرێمی کوردستانیش یەکشەممەی بە یەکەم رۆژی جەژن دیاریکرد، دوای ئەوەی بە گوتەی خۆیان، مانگی شەوال بینرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ