ئاسایشی سلێمانی: بکوژی ئەو گەنجەمان دەستگیرکرد کە لەنێو کافتریایەکدا کوژرا

 

کاژێر 11:30 خولەکی شەوی هەینی 6-1-2023، ئاسایشی سلێمانی راگەیێندراوێکی لەبارەی رووداوەکە بڵاوکردووەتەوە و دەڵێت: کاژێر 07:30 خولەکی ئێوارەی رۆژی هەینی "گەنجێک بە ناوی (ر، خ ،ع) لە کافتریایەکی نزیک پردی خەسرەوخاڵ لە شەقامی سالم کە کارمەندی کافتریاکە بووە لە لایەن کەسێکەوە بە چەکی جۆری (دەمانچە) تەقەی لێدەکرێت و گیان لەدەستدەدات. پاش وەرگرتنی رەزامەندی دادوەر دەستکرا بە لێکۆڵینەوەی ورد لە رووداوەکە و دەستکەوتنی سەرەداو لەسەر هەڵاتنی بکوژەکە بۆ دەرەوەی شاری سلێمانی. هێزەکانمان بە هاوکاری بەڕێوەبەرایەتیی ئاسایشی گەرمیان توانیان کەمتر لە دوو کاژێر تۆمەتباری رووداوەکە دەستگیر بکەن و رووبەڕووی یاسای بکەنەوە."

 

لە بەشێکی دیکەی راگەیێندراوەکەدا هاتووە، بەپێی لێکوڵینەوە سەرەتاییەکان دەرکەوتووە کە "رووداوەکە بەهۆی کێشەی کۆمەڵایەتییەوە بووە." 

 

هەروەها بەپێی زانیارییەکانی تۆڕی میدیایی رووداو: تۆمەتبارەکە لە بازگەی بانی خێلان لە دەربەندیخان دەستگیر کراوە.

 

سامان نادر، بەڕێوەبەری سەنتەری فریاکەوتنی خێرای سلێمانی 122 بە تۆڕی میدیایی رووداوی راگەیاند بوو کە "رووداوەکە لەنێو کافتریایەک و لەژێر پردی خەسرەوخاڵ لە سلێمانی روویداوە، بەپێی زانیارییە سەرەتاییەکان تەقە لە کەسێک کراوە و کوژراوە."

 

نزار جەزا، پەیامنێری رووداو لە سلێمانی چووە شوێنی رووداوەکە و گوتی، "رووداوەکە لەنێو کافتریای لوریتا لەژێر پردی خەسرەوخاڵ لە شەقامی سالم روویداوە، کەسێک بە دەمانچە تەقەی کردووە و بەهۆیەوە کەسێکی لەنێو کافتریاکەدا کوشتووە."

 

پەیامنێری رووداو دەشڵێت، هێزە ئەمنییەکان سەیری کامێراکانی چاودێرییان کردووە و لێکۆڵینەوەش لە رووداوەکە بەردەوامە.