زەویی کشتوکاڵی لە لێواری بەنداوی دەربەندیخان.
رووداو دیجیتاڵ
بەهۆی بارانی بەخوڕەوە ئاستی ئاوی بەنداوی دەربەندیخان بەشێوەیەکی بەرچاو بەرزبووەتەوە و بەشێکی زەوییە کشتوکاڵییەکانی دەوروبەری داپۆشیوە.
زیاتر لە 200 مەتری ئاوەکە هاتووەتە سەر زەوییەکەی هاوار لەتیف کە جوتیارێکی گوندی توڵەبییە لە دەربەندیخان. ئەم ساڵ ئاوی بەنداوەکە بەشێکی گەنم و شوتییەکەی داپۆشیوە.
هاوار لەتیف دەڵێت: "نزیکەی 12 جوتیارین. گەنمە، کاڵەکە و شوتییە، وەڵلا لە خودا بەزیادبێت ساڵانی پێشوو باشبوو. ئەم ساڵیش بەهۆی ئەم دەریاچەیەوە هەندێک زەرەر و زیانمان بەرکەتووە. لە گەنم و شتەکانمان ئەگینا لەخودا بەزیادبێت هیچ كێشەی نەبوو، باش بوو."
بەرزبوونەوەی ئاستی ئاوی دەربەندیخان تەنیا زیانی بۆ گوندەکانی نزیک لە بەنداوەکە نەبووە، بەڵکو زەویی جوتیارانیش لە پارێزگای هەڵەبجە و شارەزوو زیانیان بەرکەوتووە.
جووتیارێک لە گوندی کەڵهوڕان لە شارەزوور 45 ساڵە سەرقاڵی کشتوکاڵە. بەرزبوونەوەی ئاستی ئاوی بەنداوەکە 30 دۆنم زەوی ئەویشی کردووە بەژێر ئاوەوە.
سەرکەوت مەحموود جووتیارە و دەڵێت: "لە هەشتاکەنەوە پیشەم کشتوکاڵکردنە. خەریکی گەنم و کشتوکاڵم. دەریاچەکە 30 دۆنم گەنمی کردووم بەژێرەوە. تا ئێستا زیانەکانیشی زۆرە. ئێمە ئەوە بە زیان نازانین، چونکە پێشوەختە خۆمان بۆ ئامادە کردبوو. من دەمزانی ئاوی دەریاچەکە دێت."
محەممەد حەمید، جووتیارێکی دیکەیە و دەڵێت: "بەڕاستی زیانێکی گەورەیە لە حکومەتی هەرێم و حکومەتی عێراقیش، چونکە داهاتەکەمان کەم دەکات، لەڕووی بەروبووم و بەرهەمیشەوە زۆر زیان دەکەین. ئێمە بەرهەمێکی زۆر باشمان بۆ هەموو عێراق و هەرێمی کوردستان هەیە."
پێنج ساڵە بەنداوی دەربەندیخان سەرڕێژ نەبووە؛ ئەم ساڵ لە سنووری بەنداوی دەربەندیخان 847 ملیمەتر باران باریوە. بەنداوەکە کەمتر لە 20 سانتیمەتری ماوە بۆ ئەوەی بەتەواوەتی سەرڕێژ بکات.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ