ئایلین دەلایی (لای چەپ) پلەی یەکەمی لە پاڵەوانێتیی نێودەوڵەتیی کاراتیدا بەدەستهێناوە.
رووداو دیجیتاڵ
کچێکی کورد لە پاڵەوانێتیی نێودەوڵەتیی کاراتیدا کە لە ئێران بەڕێوەچوو، پلەی یەکەمی بەدەستهێنا.
پاڵەوانێتیی نێودەوڵەتیی کاراتی لە رۆژانی رابردوودا لە مازەندەرانی ئێران بەڕێوەچوو و تێیدا کچێکی تەمەن 13 ساڵانی کورد لە بەشی مێرمنداڵاندا پلەی یەکەمی بەدەستهێنا.
ئایلین دەلایی میلان بە تۆڕی میدیایی رووداوی راگەیاند، سێ ساڵە کارتی دەکات و بۆ یەکەمجار بووە لە پاڵەوانێتییەکی نێودەوڵەتیدا بەشداری بکات.
ئایلین خەڵکی شاری ماکۆی پارێزگای ورمێی رۆژهەڵاتی کوردستانە و نیشتەجێی شاری ئامولی پارێزگای مازەندەرانە لە باکووری ئێران؛ ئەو لە پاڵەوانێتییەکەدا توانی لە بەشی کێبڕکێ پلەی یەکەم و لە بەشی نمایشی هونەرەکانی کاراتیدا لە نێو 94 وەرزشوانی کاراتییدا پلەی دووەم بەدەست بهێنێت.
پاڵەوانێتیی نێودەوڵەتیی کاراتی بە بەشداری 700 یاریزان لە رەگەزی نێر و دوو هەزار و 600 لە رەگەزی مێ لە ئێران و رۆژهەڵاتی کوردستان، عێراق و هەرێمی کوردستان، سریلانکا، سڕبیا و ئەفغانستان لە رۆژانی پێنجشەممە و هەینی 28 و 29-09-2023 لە شارەکانی بابولسەر و فەرەیدوون‌کەناری پارێزگای مازەندەرانی ئێران، بەڕێوەچوو.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ