پسپۆڕێکی خۆراک: کافایین و کحول ئارەقکردنەوە زیاددەکەن

 

هاری لاکشمی، پسپۆڕی خۆراکی راوێژکار دەڵێت: ''ئارەقکردنەوە کردەیەکی فیسیۆلۆژی جەستەییە و بۆ هاوسەنگکردنی پلەی گەرمیی جەستە پێویستە، بەڵام دەکرێت بەهۆی چەند کاریگەرییەک رێژەکەی کەم یاخود زیادبکرێت.'' 

 

پسپۆڕەکە بەشێک لەو خۆراکانە رووندەکاتەوە کە دەشێت ئارەقکردنەوە کەمبکەنەوە و لەبارەی خواردنەوەی ئاوەوە دەڵێت: ''خواردنەوەی ئاوی پێویستی رۆژانە پلەی گەرمیی جەستە بە هاوسەنگی دەهێڵێتەوە، بەجۆرێک رۆژانە پیاوان زیاتر لە 3.5 لیتر و خانمان 2.5 لیتر بخۆنەوە.''

 

هەروەها دەشڵێت: ئەو خۆراکانەی دەوڵەمەندن بە ریشاڵەکان وەکو 'خۆراکە دەنەوێڵەی تەواوەکان، برنج و ئاردی بۆر و شۆفان' هەرسکردن خێرادەکەن، بەمەش پلەی گەرمیی بە جێگیری دەهێڵنەوە و ئارەقکردنەوە کەمدەکەنەوە. 

 

بە گوتەی هاری لاکشمی، ئەوانەی خۆراکی دەوڵەمەند بە چەورییە ناتێرەکان دەخۆن وەکو 'زەیتی زەیتوون، گوێز و ماسی' کەمتر ئارەقدەکەنەوە بەراورد بەوانەی چەورییە تێرەکان دەخۆن، چونکە خۆراکی قورس وادەکات جەستە وزەیەکی زۆر بەکاربهێنێت بۆ هەرسکردن، سەرئەنجام ئارەقکردنەوە زیاددەبێت. 

 

لە بارەی میوەکانیشەوە دەریدەخات، ئەو سەوزە و میوانەی بڕێکی زۆر ئاویان تێدایە وەکو 'ترێ، شووتی، سێو، هەرمێ، پرتەقاڵ، خەیار و سپێناخ' دەشێت یارمەتیدەربن لە کەمکردنەوەی ئارەقکردنەوە. 

 

هەرچەندە خواردنەوەی شلەمەنی و خواردنەوە گەرمەکان ئارەقکردنەوە زیاددەکەن، بەڵام بە گوتەی پسپۆڕەکەی خۆراک خواردنەوەی چای سەوز یارمەتیدەرە لە باشتربوونی ناوەندە کۆئەندامی دەمار و کۆنتڕۆڵکردنی ئارەقکردنەوە. 

 

پسپۆڕەکە گوتی، خواردنەوەی ئەو خواردنەوانەی بڕێکی زۆر لە کافایینایان تێدایە یاخود خواردنەوەی کحول ئارەقکردنەوە زیاددەکەن، چونکە دەبنەهۆی زیادبوونی گوشاری دەروونی کە هاندەرێکی سەرەکییە بۆ بەرزبوونەوەی پلەی گەرمیی جەستە.