ماڵی میوزیکی زەهاوی دوایین کۆنسێرتی لە 2022 پێشکێش دەکات

 

هەژار زەهاوی، هونەرمەند و بەرپرسی ماڵی میوزیکی زەهاوی، بە رووداوی راگەیاند، سبەی پێنجشەممە 27-10-2022، دوایین کۆنسێرتی لە 2022 لە قەڵای هەولێر پێشکێش دەکات و ژمارەیەک هونەرمەند و دوو شاعیر تێیدا بەشدارن.

 

ئاماژەی بۆ ئەوەشکرد، لە کۆنسێرتەکەدا گرووپی میوزیکی راگرین و هەریەک لە هونەرمەندان رێکێش سەیرانی، پێشەوا رەمەزان، رێڤین ئاراس و ئاشتی عەزیز بەشدارن و چەند بەرهەمێک پێشکێش دەکەن، جگە لە هەردوو شاعیر بورهان زێباری و هەڵۆ شێرکۆ بێکەس کە دەقە شیعرییەکانیان دەخوێننەوە.

 

ئامادەبوون لە کۆنسێرتەکەدا بە تیکتە و کاژێر 7:00ـی ئێوارە لە قەڵای هەولێر بەڕێوەدەچێت و تۆڕی میدیایی رووداو سپۆنسەری میدیایی کۆنسێرتەکەیە.

 

ماڵی میوزیکی زەهاوی لە 4 تشرینی دووەمی 2021، بە کۆنسێرتی هونەرمەندانی هەرچوار پارچەی کوردستان راگەیێندرا و لەلایەن نێچیرڤان بارزانی، سەرۆکی هەرێمی کوردستان بۆ ماوەی دوو ساڵ پاڵپشتی کراوە.