رووداو دیجیتاڵ
بەهای دینار بەرامبەر بە دۆلار بەردەوامە لە بەرزبوونەوە و ئێستا [کاژێر 08:45ـی شەوی یەکشەممە]، 100 دۆلار بە کەمتر لە 150 هەزار دینار دەفرۆشرێت.
ئێوارەی ئەمڕۆ یەکشەممە، 24-12-2023، ئامانج ساڵح میرزا، نوێنەری بازاڕی دۆلارەکەی سلێمانی بە تۆڕی میدیایی رووداوی راگەیاند، ئێستا [کاژێر 08:45ـی شەو]، بەهای 100 دۆلاری ئەمریکی بۆ 149 هەزار و 900 دینار دابەزیوە.
ئامانج ساڵح میرزا هۆکاری بەرزبوونەوەی بەهای دیناری بۆ ئەوە گەڕاندەوە کە کۆمپانیاکان لەبەر رێنوێنییەکانی بانکی ناوەندیی عێراق بۆ گۆڕینی مامەڵەکانیان دۆلارەکانیان دەکەن بە دینار و دۆلارێكی زۆریش کەوتووەتە بازاڕەوە.
ئەمڕۆ لە سەرجەم بازاڕەکانی عێراق بەهای دینار بە شێوەیەکی بەرچاو بەرزبووەوە و 100 دۆلار بە 150 هەزار تێپەڕی نەکرد و لەنێوان 149 هەزار و 400 تاوەکو 150 و 500 دینار دەفرۆشرا. ئەندامێکی ئەنجوومەنی بازاڕی ئاڵوگۆڕی دراو لە هەولێر دەڵێت، "لە شەش مانگی رابردوودا بۆ یەکەم جارە بەهای دینار هێندە بەرزبێتەوە."
لەلایەکی دیکەوە، نیوەڕۆی ئەمڕۆ یەکشەممە 24-12-2023 حاجی سابیر باواجی، ئەندامی ئەنجوومەنی بازاڕی ئاڵوگۆڕی دراو لە هەولێر بە تۆڕی میدیایی رووداوی گوت، "ئەمڕۆ بەهای دینار بە شێوەیەکی بەرچاو بەرزبووەوە و 100 دۆلار بە 149 هەزار و 800 دینار دەفرۆشرێت."
ئەو ئەندامەی ئەنجوومەنی بازاڕی ئاڵوگۆڕی دراو لە هەولێر گوتیشی، لە شەش مانگی رابردوودا یەکەم جارە بەهای دینار بەرامبەر دۆلار بەو شێوەیە بەرزببێتەوە. لە کاتێکدا لە مانگی رابردوودا 100 دۆلار بە زیاتر لە 150 هەزار دینار دەفرۆشرا.
کۆمێنتەکان
وەک میوان کۆمێنتێك بنووسە یان وەرە ژوورەوە و هه‌موو خزمەتگوزارییەکان به‌كاربێنه
کۆمێنتێک دابنێ