Hewlêr (Rûdaw) - Li Enqereyê bi beşdariya Serokkomarê Tirkiyeyê û Serokê Giştî yê AK Partiyê Recep Tayyîp Erdogan, Kongreya 8emîn a Giştî ya AK Partiyê tê lidarxistin.
Pêvajoya Kongreya 8emîn a Giştî ya AK Partiyê 12ê Çiriya Pêşîn a 2024an bi kongreyên navçeyan dest pê kir.
Piştre 30ê Çiriya Paşîn a 2024an jî AK Partiyê kongreyên xwe yên bajaran li dar xist.
7ê Sibata 2025an kongreya 8emîn a Stenbolê jî hat lidarxistin û bi vê yekê AK Partiyê kongreyên xwe yên li 81 parêzgehên Tirkiye û Bakurê Kurdistanê temam kirin.
Îro li Salona Werzişê ya Enqereyê Kongreya 8emîn a Giştî ya AK Partiyê bi beşdariya Serokkomarê Tirkiyeyê Recep Tayyîp Erdogan tê lidarxistin.
Dirûşma vê carê ya kongreyê "Di navê wê de spî û roniya wê de paşeroj" e.
1607 delegeyên AK Partiyê dê deng bidin
Di kongreyê de 1607 delegeyên AK Partiyê deng didin.
Recep Tayyîp Erdogan berî kongreyê li ser hesabê xwe yê medyaya civakî peyamek belav kir û got ku ew dê deriyên serdemeke nû vekin.
Li gorî medyaya Tirkiyeyê tê texmînkirin ku dê di rêveberiya AK Partiyê û kabîneya wezîran de guherîn çêbibin.
AK Partî 14ê Tebaxa 2001ê bi serokatiya Recep Tayyîp Erdogan hat damezirandin.
3ê Çiriya Paşîn a 2002yan ji sedî 34,28ê dengan bi dest xist û bi tena serê xwe bû desthilat.
Wê demê ji ber qedexeya siyasî ya li ser Erdogan bi serokatiya Abdullah Gul yekem hikûmeta AK Partiyê hat damezirandin ku 58emîn hikûmeta Tirkiyeyê bû.
Erdogan ku ji ber qedexeya siyasî 3ê Çiriya Paşîn a 2002yan nekarî beşdarî hilbijartinan bibe, 8ê Adara 2003yan li Sêrta Bakurê Kurdistanê di hilbijartinan de wek parlamenter hat hilbijartin.
Piştî ku Abdullah Gul ji hikûmeta 58emîn îstifa kir, Erdogan 14ê Adara 2003yan 59emîn hikûmeta Tirkiyeyê ava kir.
Erdogan cara yekem di hilbijartinên 10ê Tebaxa 2014an de ji sedî 51,7ê dengan bi dest xist û rasterast bi dengên gel bû 12emîn Serokkomarê Tirkiyeyê û ji wê demê ve Serokkomar e.
AK Partî di hilbijartinên giştî yên 14ê Adara 2023yan de jî bû yekem partî.
Lê ji destpêka desthilata xwe ve cara yekem di hilbijartinên şaredariyan ên 31ê Adara 2024an de bû partiya duyem.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse