Hewlêr (Rûdaw) - Di çarçoveya lêpirsîneke ku li ser pirtûka Hînkerê ya fêrkirina zimanê Kurdî 2 kesên din hatin desteserkirin.
Di heman lêpirsînê de Samî Tan û Ronayî Onen hatin berdan lê Îzzet Çinar û Şukran Çinar hatin desteserkirin.
8 baroyên Bakurê Kurdistanê bi daxuyaniyekê nerazîbûn nîşan da.
Hêzên ewlehiyê yên Tirkiyeyê doh bi fermana Serdozgeriya Komarê ya Stenbolê bi ser malên nivîskarên Kurd Mevlut Aykoç, Samî Tan û Ronayî Onen de girtin.
Her sê nivîskar ji ber amadekirina pirtûka Hînkerê ya fêrkirina zimanê Kurdî hatine desteserkirin.
Hat ragihandin ku îro jî di çarçoveya heman lêpirsînê de hêzên ewlehiyê li Stenbolê bi ser mala Îzzet Çinar û Şukran Çinarê de jî girtiye û ew jî desteser kirine.
Mevlut Aykoç, Îzzet Çinar û Şukran Çinar dê sibe derkevin pêşberî dozger.
Komîsyonên zimanê Kurdî yên Baroyên parêzgehên Amed, Agirî, Êlih, Mêrdîn, Riha, Sêrt, Şirnex û Wanê yên Bakurê Kurdistanê bi daxuyaniyeke hevbeş nerazîbûn nîşan da.
Baroyan di daxuyaniya xwe de got:
“Biserdegirtina malên nivîskarên Kurd û desteserkirina wan ne hiqûqî ye.
Divê nivîskarên Kurd demildest werin berdan.”
Çi bûbû?
Roja çarşemê hêzên ewlehiyê di operasyoneke hemwext de bi ser malên nivîskarên Kurd Mevlut Aykoç, Samî Tan û Ronayî Onen de girtin û ew desteser kirin.
Mevlut Aykoç li Stenbolê, Samî Tan li Rihayê û Ronayî Onen jî li Amedê hatibû desteserkirin.
Li gorî zanyariyan nivîskarên Kurd ji ber pirtûka fêrbûna Kurdî ya bi navê Hînkerê hatine desteserkirin.
Di çarçoveya lêpirsînê de îfadeya Serokê Komeleya Ziman û Çanda Kurdî ya Rihayê Samî Tan li Birêvebiriya Ewlehiyê ya Rihayê hat wergirtin û piştre hat berdan.
Her wiha Ronayî Onen jî li Stenbolê piştî wergirtina îfadeyê hat berdan.
Di lêpirsînê de hatibû îdiakirin ku Hînker “materyaleke perwerdehiya îdeolojîk a rêxistinê” ye.
Ji Samî Tan jî pirsên derbarê pirtûka fêrbûna Kurdî Hînkerê hatin kirin ku wî bi hevkariya Ronayî Onenê, Mevlut Aykoç û Mehmet Sadik Varli sala 2010ê amade kiribû.
Her wiha sedema amadekirina asta 3yemîn a Hînkerê hat pirsîn ku ji aliyê Enstîtuya Kurdî ve salên 2010, 2011 û 2012an ji bo weşanê hatiye amadekirin.
Samî Tan di îfadeya xwe de diyar kir ku Hînker tenê ji bo kursên taybet ên zimanê Kurdî hatiye amadekirin.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse