Hewlêr (Rûdaw) - Hikûmeta Almanyayê biryar da ku erkê artêşa xwe ya li Îraqê saleke din dirêj bike.
Biryara hikûmetê dê biçe parlamentoyê û dê li wir were pesendkirin.
Hikûmeta Almanyayê di daxuyaniya ku li ser biryarê ragihandiye de got:
“Artêşa me dê li ser daxwaza Îraqê li wî welatî bimîne û piştevaniya aştî û aramiyê bike.”
Erkê hêzên Almanyayê yên li Îraq û Herêma Kurdistanê di 31ê Çiriya Pêşîn de bi dawî dibe.
Hikûmeta Almanyayê berî wê dîrokê ew erk salekê dirêj kir û tê çaverêkirin ku Parlamentoya Almanyayê jî deng li ser dirêjkirinê bide.
Parlamentoya Almanyayê dê deng bide
Parlamentoya Almanyayê dê 20ê Îlonê dest bi rûniştinên xwe bike.
Piştî parlamentoyê deng li ser biryara hikûmetê da, piştre divê ji aliyê Encûmena Federal ve jî were pesendkirin.
Parlamentoya Almanyayê 21ê Çiriya Pêşîna 2022yan ji bo biryardana li ser dirêjkirina dema mayîna hêzên xwe yên li Îraqê civiyabû.
Di wê civînê de ji 644 parlamenteran 535an ji wan ji bo dirêjkirina erkê hêzên xwe dengê “Erê”, 104an dengê “Na” da, 4 parlamenteran jî deng neda.
Almanya ji sala 2014an ve, endamê Hevpeymaniya Navdewletî ya li dijî DAIŞê ye.
Almanya bi rêya operasyonên esmanî, perwerde, parvekirina zanyariyan, lêkolîna tawanên DAIŞê, cezakirina çekdarên wê û avakirina herêmên rizgarkirî, alîkariya Îraq û Herêma Kurdistanê dike.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse