Wêne: AA
Hewlêr (Rûdaw) - Avahiyeke 5 qatî ye li parêzgeha Êlihê 465 kîlometre ji navenda erdhejên 6ê Sibatê yên Mereşê dûr e lê piştî erdhejê zerareke zêde gihiştiyê. Sedem jî ew e ku kelûpelên avahîsaziyê wek pêdivî di çêkirina wê de nehatine bikaranîn.
Welatî Bahddîn Ersoz got, “4 kolonên avahiya me ji xişt hatine çêkirin. 8 kolonên sereke yên mayî jî derizîne. Hemû kolon tewiyane. Di vê avahiyê de 18 yekeyên niştecihbûnê û 2 dikan hene. Em li hemûyan geriyan, dîwarên piraniya wan ketine û hemû kolonên wan yekeyan qelişîne.”
Avahiya Odeya Mîmar û Endezyaran a Mereşê derdora wê hilweşiyaye, lê tevî erdhejên 7.7 û 7.6 ew li ser pêyan e.
Endezyarekî ji Mereşê got, “Ev Odeya Endezyaran e ku ser bi odeya Mîmar û Endezyaran e. Ti derzek tê de nîne. Erdhejê ti bandor lê nekirine. Lê mixabin li navenda Mereşê gelek avahî ji ber çavdêrînekirinê û gelek sedemên teknîkî hilweşiyane. Gelek sedemên wê hene. Quma deryayê hatiye bikaranîn. Hesin bê kalîte ye.”
Li gor hinek endezyaran di metrekareyekê de xerciya hesin û betona avahiyeke wek pêdivî 2 hezar û 100 lîreyên Tirkî ye. Çiqas kêm bê bikaranîn jî hezar û 890 lîre bo heman xerciyan pêwîst in. Wate di navbera avahiyeke bo erdhejê saxlem û ne saxlem de bo demir û betonê di yek metrekaryê de tenê 210 lîre ferq heye ku dike 11 dolar.
Li gor amarên roja Pêncşemê di erdhejên 6ê Sibatê de li 11 parêzgehên Bakurê Kurdistan û Tirkiyê 164 hezar û 321 avahî hilweşiyane yan zerareke zêde dîtine, yan jî divê bilez bên hilweşandin. Pisporên avahisayê jî dibêjin sedema sereke ya wan zereran jî wek pêdivî bikarneanîna kelûpelên avahîsaziyê ye.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse