Wêne: AFP
Hewlêr (Rûdaw) - Li Brîtanyayê vê hefteyê ciwanekî Kurd ê 25 salî bi tohmeta qaçaxçîtiya mirovan hat girtin.
Ajansa Niştimanî ya Nehiştina Tawanan a Brîtanyayê ragihand kesê ku hatiye girtin welatiyê Îraqê ye.
Lêkolerê ajansê Al Meuln diyar kir ku wan berê jî mirovekî Kurd ê 32 salî ku welatiyê Îranê Rojhilatê Kurdistanê) bû û navê wî yê pêşî Amanc bû, girtibû.
Li gorî wî lêkolerî, ew he rdu kes beşdarî derbaskirina xelkê ya bi qeyikan a ji Kanala Îngilîz bûne.
Ajansa Brîtanî ragihand ku toreke berfireh a qaçaxçîtiya mirovan ku piraniya wan Albanî û Misirî ne hatiye girtin.
Li gorî ajansê, ev tor nêzikî salekê di bin çavdêriya dezgehên îstixbaratî û ewlehiyê yên Brîtanyayê de bû û piştî komkirina belgeyên pêwîst, endamên wê hatin girtin.
Li aliyê din, 4 koçber piştî ku qeyika wan qul dibe, li Kanala Îngilîzî canê xwe ji dest didin.
Lê belê 63 koçberên din ku rêwiyên heman qeyîkê bûn, ji mirinê hatin rizgarkirin û ew li Fransayê hatin vegerandin.
Tenê rojên duşem û sêşemê yên vê hefteyê, 484 koçber ji Fransayê bi qeyîkan derbasî Brîtanyayê bûne.
Îsal 11 koçber di wê navberê de xeniqîne ku du ji wan keçikên 7 salî bûn.
Şîrove
Bi mêvanî şîroveyekê binivîse an jî têkeve hesabê xwe da ku malperê bi awayekî yeksertir û berfirehtir bi kar bînî
Şîroveyekê binivîse